Instituti Hidrometorologjik i Kosovës sot informoi se fushat me presion të ulët atmosferik që kanë përfshirë pjesën e Gadishullit të Ballkanit do të jenë të qëndrueshme dhe me tendencë në rritje. Sipas parashikimeve, kjo situatë meteorologjike do të kushtëzojë mot kryesisht të vranët.

Instituti informoi se të hënën për shkak të prezencës së vlerave pozitive në fushat termike, parashihet të bie shi në viset e ulëta dhe mesatare, ndërsa në viset e larta parashihet të bie borë. Ndërsa, nga dita e martë reshjet parashihen të jenë në formë dëbore edhe në viset e ulëta.

‘Këto reshje do të ndikojnë në uljen e temperaturave në të dy vlerat ekstreme. Temperaturat minimale do të lëvizin ndërmjet -4 deri 1 gradë Celsius, ndërsa maksimalet e ditës parashihen të lëvizin ndërmjet 2 deri 8 gradë Celsius.”, bëri të ditur IHMK.

Ndërkaq, sipas parashikimeve, do të fryjë erë nga drejtimi i jugperëndimit dhe veriperëndimit me shpejtësi 1-7m/s në rrafshin e Kosovës, ndërsa në veriperëndim të Dukagjinit shpejtësia maksimale e erës mund të arrijë deri 18m/s./21Media