Presidenti i Kinës premton “ribashkim” ​​me Tajvanin

Presidenti kinez, Xi Jinping ka thënë në një fjalim se “ribashkimi” me Tajvanin “duhet të përmbushet”.
Xi shtoi se bashkimi duhet të arrihet në mënyrë paqësore, por paralajmëroi se populli kinez kishte një “traditë të lavdishme” të kundërshtimit të separatizmit.
Në përgjigje, zyra presidenciale e Tajvanit tha se e ardhmja e ishullit ishte në duart e njerëzve të saj, transmeton rtv21.tv.
Tajvani e konsideron veten një shtet sovran. Sidoqoftë, Kina e sheh Tajvanin si një provincë të shkëputur.
Pekini nuk ka përjashtuar përdorimin e mundshëm të forcës për të arritur bashkimin.
Reagimi i Xi vjen pas një valë prej rreth 150 fluturimesh ushtarake kineze në zonën e mbrojtjes ajrore të Tajvanit gjatë javës së kaluar.
Por fjalimi, i cili erdhi në 110 vjetorin e revolucionit që përmbysi dinastinë e fundit perandorake të Kinës në vitin 1911, ishte më pajtues sesa ndërhyrja e tij e fundit e madhe në Tajvan në korrik, ku ai u zotua të “shkatërronte” çdo përpjekje për pavarësinë zyrtare të Tajvanit.
“Detyra historike e ribashkimit të plotë të atdheut duhet të përmbushet dhe patjetër do të përmbushet”, tha Xi. Ai tha se donte të shihte bashkimin paqësor nën një politikë “një vend-dy sisteme”, e ngjashme me atë të përdorur në Hong Kong./21Media