Në ambientet e librarisë “Dukagjini” në Prishtinë sot është promovuar dokuromani “Një fije shprese, një fije shkrepëse” i shkrimtarit Ag Apolloni.

I botuar nga shtëpia botuese “Bard Books” ky roman është krijim interesant i Apollonit për faktin se përshkruan regjimin serb gjatë luftës së fundit, dëbimet dhe djegiet, spastrimin etnik e intervenimin ushtarak të NATO-s.

Romani dokumentar “Një fije shprese, një fije shkrepëse” i Ag Apollonit, është përshkrim i një vizite të tre shokëve në shtëpinë e nënës Ferdonije, e cila gjatë luftës ka humbur katër djemtë dhe burrin. Linja e parë e këtij romani është udhëpërshkrim dhe mbaron aty ku nis. Mirëpo brenda saj gërshetohen edhe linja të tjera, që shpalosin histori të përndjekjes, shpërnguljes, dhunimit, vrasjeve, masakrave, pritjes dhe vetëvrasjes.

Bashkë me historinë e Ferdonijes, rrëfehet edhe historia e nënës Pashkë, e cila pak ditë pasi iu kthyen mbetjet e dy djemve, bëri vetëvrasje. Po ashtu, e bazuar krejtësisht në materiale arkivore, vihet edhe një paralele mes Luftës së Dytë Botërore dhe Luftës së Kosovës, përkatësisht mes kampeve të shfarosjes dhe kampeve të shpërnguljes. Ndërsa, në funksion të plotësimit të mozaikut të tragjedisë kosovare, rrëfehen edhe përvojat personale të tre shokëve, në raport me luftën.

Dokuromani i Apollonit nga sot gjendet nëpër librari. /21Media