Qytetarët mirëpresin lëvizjen pa viza: E kemi merituar

Poseduesit e pasaportave të Kosovës duke filluar nga sot (e hënë) do të mund të udhëtojnë drejt Zonës Schengen pa viza për qëndrime afatshkurtra.

Qytetarët e mirëpritën liberalizimin vizave, të cilët shprehën se lëvizja e lirë në vendet e BE-së është një arritur e madhe pas një keqtrajtimi të gjatë. Ata  ndjehen të lumtur që nuk do të ketë më kufizime e pritje të gjata para ambasadave.

Mëngjesin e sotëm, Qeveria e Kosovës ka organizuar udhëtimin e parë pa viza për 50-të fituesit që fituan udhëtimin për në Vjenë të Austrisë.

Qytetari Avdyl Spahiu tha se kjo liri është e merituar më herët, pasi që sipas tij ka pasur sfida të ndryshme, e gjithmonë të kushtëzuara.

Qytetari tjetër, Adhurim Bajrami tha se tashmë është shumë më lehtë pa viza, sepse sipas tij, nuk do të ketë shpenzime dhe nuk do të ketë humbje  kohe.

Ndërsa, Jeton Kosumi tha për KosovaPress se qytetarët janë keqtrajtuar para ambasadave që 24 vjet.

Xheladin Halimi tha se liberalizimi i vizave ka qenë një proces i stërzgjatur. Ai tha se aplikimi për viza ka qenë e vështirë dhe e kushtueshme për qytetarët.

Po ashtu, Loreta Vitija u shpreh e lumtur si një qytetare e Kosovës që nuk është më e kufizuar. Ajo tha se tani rinia e ka mundësinë ta ketë këtë liri të lëvizjes në vendet e Bashkimit Evropian.

Në kuizin e organizuar nga Qeveria e Kosovës, kishte pyetje rreth Kosovës dhe BE-së, ku 50 qytetarë kanë fituar një udhëtim falas për në Vjenë të Austrisë.