Mbi 20 mijë viktima

Mbi 20 mijë viktima

Mbretëria e Bashkuar është kthyer në vendin e pestë në botë që ka regjistruar më shumë se 20 mijë viktima në spitale, si pasojë e koronavirusit të ri.

Të dhënat e fundit kanë treguar për një total prej 20 mijë e 319 vdekjeve në këtë vend, një rritje prej 813 të numrit të viktimave në krahasim me një ditë më parë.

Drejtori mjekësor i Sistemit Kombëtar të Shëndetësisë, Stephen Powis, ka thënë muajin e kaluar se numri total i të vdekurve nën shifrën 20 mijë do të përbënte rezultat të mirë.

Mbretëria e Bashkuar ka raportuar për këto të dhëna 51 ditë pas regjistrimit të vdekjes së parë nga sëmundja COVID-19, që shkakton koronavirusi i ri.

Sipas të dhënave të publikuara nga Universiteti Johns Hopkins, në mbarë botën 2,8 milionë persona janë infektuar me COVID-19, ndërkaq, afro 200 mijë kanë vdekur.