​Rusia dhe Kina bllokojnë në OKB rezolutën për zhbllokimin e Ngushticës së Hormuzit

Kina dhe Rusia kanë përdorur të drejtën e tyre të vetos në Këshillin e Sigurimit të Kombeve të Bashkuara, duke hedhur poshtë një projektrezolutë të propozuar nga Bahreini mbi sigurinë dhe lirinë e lundrimit në Ngushticën e Hormuzit.

Gjatë seancës së zhvilluar të martën, drafti siguroi mbështetjen e shumicës me 11 vota pro dhe dy abstenime. Megjithatë, dy votat kundër nga Moska dhe Pekini zhvlerësuan nismën, për shkak të statusit të tyre si anëtarë të përhershëm me të drejtë vetoje.

Projektrezoluta bënte thirrje për zhbllokimin e kësaj rruge detare, e cila është një arterie vendimtare për tregtinë globale të energjisë. Teksti i paraqitur për votim ishte një version i zbutur ndjeshëm dhe shumë larg kërkesave fillestare të shteteve të Gjirit që e sponsorizuan atë.

Në përpjekjet e tyre të hershme, këto shtete kishin kërkuar nga Këshilli i Sigurimit autorizimin për ta hapur Ngushticën me forcë ushtarake. Për të shmangur bllokimin dhe për të gjetur konsensus, drafti përfundimtar ishte zhveshur nga çdo klauzolë që lejonte përdorimin e forcës, madje edhe për qëllime rreptësisht mbrojtëse. Pavarësisht këtyre kompromiseve thelbësore, rezoluta nuk arriti të kalojë murin e vetos ruso-kineze.