Zëvendëskryeministri Driton Selmanaj ka kërkuar falje publike ndaj të gjithë atyre që janë ndjerë të fyer nga deklarata për të pagjeturit.

Ai në një emision televiziv ka thënë se deklaratat e tij janë shtrembëruar meqë në Komisionin për të Drejtat e Njeriut, ka folur në kontekstin që për të pagjeturit duhet angazhim dhe punë.

”Unë nisem nga vetja, duke e ditur se çka ndjejë dhe bashkëdjejë”.

”Unë kam folur krejtësisht në kontekst tjetër – që për këtë temë nuk na duhen llafe shumë por punë. Mos të prekim këtë plagë shumë të rëndë, për këtë temë na duhet angazhim sepse kemi detyrim njerëzor së paku e më pas kushtetues dhe më tepër”.

”Kushdo që në një formë është ndjerë i fyer apo i lënduar nga deformimet, shtrembërimet që m’i janë bërë fjalëve të mia, unë iu kërkoj falje publike kujtdo i cili është ndjerë i fyer nga deformimet e të tjerëve që m’i kanë bërë fjalëve të mia”, është shprehur Selmanaj.

”Për mua Saranda Bogujevci, Besarta Jashari, Gramoz Berisha, dhe jo vetëm këta,  janë vet historia e gjallë e këtij vendi, janë vet populli i Kosovës”.

”Unë bashkëndjejë me secilin person që ka humbur në Kosovë. Edhe me familjen Bogujevci dhe secilin që ka humbur në Kosovë. Unë jam i këtij vendit. Por kushdo që provon të më linçojë në këtë kontekst, e ka gabim”., ka deklaruar ai.