Policë në çdo cep të Shkupit. Vetëm në bulevardin “Arradhët partizane” kishte disa pika kontrolli.

Ruajtësit e rendit po shohin nëse vozitësit janë në rregull me lejet e vozitjes, dokumentacionet e makinës, shpejtësinë dhe nëse po mbajnë maska nëse për pasagjerëkanë persona jofamiljarë!

Shmangia e ndërhyrjeve për heqjen e gjobave është arsyeja pse janë sjellë policë nga qytete të tjera.

Aksione për kontrolle të përforcuara nuk ka vetëm në Shkup po edhe në qytete të tjera, pohoi zëdhënësi i MPB-së, Toni Angellovski. Ai shtoi se qëllimi nuk është gjobitja por ngitja e kulturës dhe përmirësimi i sigurisë në trafik.

“Përballemi me ata shkelës të rregullave që më së shumti janë shkaktarë për fatkeqësi  rrugore siç janë tejkalim i shpejtësisë, vozitje nën ndikimin e alkoolit, mosdhënie e përparësisë në kalim e gjithsesi vazhdojmë edhe me ngasësit e motoçikletave të cilët me shkeljen e rregullave i shqetësojnë qytetarët në orët e vona të natës”, deklaroi Toni Angellovski – Zëdhënës i MPB-së.

Qytetarët e përshëndetën aksionin. Se sa ndihen të sigurt në trafik, TV21 intervistoi disa prej atyre që në vend të makinës zgjedhin biçikletat ose trotinetet për të lëvizur në qytet.

“Motoristët! Motoristët më e rëndësishmja, ata që vozisin këtu 100 e ca në orë! Sipas meje më lehtë është të lëvizësh me makinë se sa me biçikletë. Me biçikletë është e rrezikshme sepse mund të pësosh sepse nuk janë të kujdesshëm aspak, katastrofë është, trafiku në Shkup është katastrofë”, u shpreh një qytetar.

“Po mund të vihet re shumë në vizat e bardha se nuk ka asnjë lloj kulture. Këmbësori nuk ka përparësi e as çiklistët ose me trotinet, pa marrë parasysh”, shtoi një qytetar tjetër.

Aksioni do të vazhdojë edhe në ditët në vijim. Në gatishmëri janë edhe karrotrecët.

Vetëm gjatë ditës së djeshme në Shkup janë shqiptuar 514 gjoba. Në Shkup janë sanksionuar 160 persona për mos-vendosje të maskës në makinë, kur shoferi është me një person që nuk jeton me të në të njëjtën shtëpi, raporton TV21./21Media