Pas tërmetit gjatë natës, lëkundje të forta në Durrës dhe Tiranë u ndjenë edhe këtë pasdite të cilat zgjatën për disa sekonda.

Sipas IGJEUM magnituda e tërmetit është 4.2 e shkallës Rihter me epiqendër Gjirin e Lalëzit dhe thellësi 6 km.

Sizmiologu, Llambro Duni, nga IGJEUM tha se ka qenë një tërmet i cekët dhe kjo ka bërë që të ketë ndjeshmëri në një rajon të gjerë.

Duni: “Madhësia e vlerësuar është 4.2 i shkallës Rihter, thellësia 6 km. Është një tërmet i cekët dhe kjo shpjegon edhe ndjeshmërinë në një rajon relativisht të gjerë. Epiqendra e tij është rreth 1.8 km në jug të fshatit Kuraten në Gjirin e Lalëzit”.

Duni shpjegoi se ditët e fundit janë regjistruar disa lëkundje në këtë rajon.

Duni: “Ditët e fundit kemi pasur në këtë rajon  disa lëkundje. Mendojmë se janë paragoditje të kësaj ngjarje dhe do të pasohet nga disa lëkundje të tjera që shpresojmë se do të vinë duke u ulur”.

Ndërkohë që EMSC raportoi se magnituda e lëkundjeve ishte 4.5 e shkallës rihter me epiqendër detin Adriatik./oranews