Kuvendi Komunal i Prishtinës ka futur në rend dite propozimin e grupit të Partisë Demokratike të Kosovës për ofrimin e transportit publik pa pagesë prej muajit nëntor deri në muajin mars, për shkak të nivelit të lartë të ndotjes së ajrit në kryeqytet dhe përhapjes së COVID-19.

PDK-ja përmes një komunikate ka thënë se implementimi i këtij projekti shkarkon trafikun e kryeqytetit, mbron ambientin, kursen kohën dhe xhepin e qytetarëve.

“Kosto e mbulimit të biletave të qytetarëve, Buxhetit të Komunës pritet t’i kushtojë mbi 1.2 milionë euro”, thuhet në komunikatë.

Asamblisti i PDK-së Leutrim Retkoceri në propozim tha se mjetet financiare mund të merren nga kategoria e mallrave dhe shërbimeve, ku deri më tani kemi vetëm 57% e buxhetit të shpenzuar në këtë kategori.

Sipas tij, më mirë është që të ndahen këto mjete për të paguar biletat e qytetarëve të Prishtinës, sesa të përfundojnë si tepricë buxhetore.

Ndryshe, kjo ide u prezantua më herët nga asamblistja e PDK-së, Suzana Vuqitërna- Kika dhe nënkryetari i PDK-së në Prishtinë, Ilirik Musliu./21Media