Shtetet e Bashkuara, përmes Agjencisë së Sh.B.A.-ve për Zhvillim Ndërkombëtar (USAID), kanë obliguar një shumë shtesë prej 500,000 dollarësh amerikan për të mbështetur masat parandaluese ndaj përhapjes së COVID-19 në Kosovë. Siç njoftohet në komunikatë, deri më tani, USAID ka obliguar mbi 1.6 milion dollarë merikan për të mbështetur masat parandaluese ndaj përhapjes së COVID-19 në Kosovë. 

“Që nga rasti i parë i infeksionit me COVID-19, i cili u konfirmua më 13 Mars 2020, ndihma e USAID u përqëndrua në bashkëpunimin me punëtorët e vijës së pare të frontit dhe komunitetet për të ngadalësuar përhapjen, siguruar kujdesin për të prekurit si dhe pajisjet e nevojshme për të luftuar kundër COVID-19. Për shembull, ne kemi shpërndarë 239 pako higjienike nëpër qendrat shëndetësore, 8950 pako familjare dhe 1200 pako për fëmijë në të gjitha 38 komunat e Kosovës.”, njoftoi USAID.

 Lufta kundër COVID-19 ende nuk ka mbaruar, prandaj sipas USAID-it, kjo ndihmë shtesë nga populli amerikan do të vazhdojë të sigurojë mbështetje operacionale dhe të rrisë aftësinë e reagimit të duhur nga ana e Kosovës në ndalimin e përhapjes së mëtutjeshme të COVID-19 dhe zbutjen e pasojave të saj.   

Gjatë 20 vjetëve të fundit, shuma e gjithmbarshme e mjeteve të investuara nga Shtetet e Bashkuara për të ndihmuar Kosovën tejkalon 772 million dollarë amerikan.

“Për më shumë se gjysmë shekulli, Shtetet e Bashkuara kanë qenë kontribuesi më i madh i sigurisë shëndetësore globale dhe ndihmës humanitare. Ne ishim në vijën e parë të luftës kundër Ebolës, vazhdojmë te mbështesim vendet që luftojne kundër HIV/AIDS-it, tuberkulozit, malaries dhe sëmundjeve të tjera infektive, dhe poashtu do të udhëheqim përgjigjen globale ndaj sëmundjes së koronavirusit të ri (COVID-19). Që nga shpërthimi i COVID-19, Qeveria e Sh.B.A.-ve ka zotuar më shumë se 900 milion dollarë amerikan ndihmë, që veçërisht synojnë luftimin e pandemisë. Ky financim do të shpëtojë jetë duke përmirësuar arsimimin mbi shëndetit publik, mbrojtur punonjësit shëndetësor, forcuar sistemet laboratorike, rritur mbikëqyrjen e sëmundjes si dhe kapacitetin e reagimit të shpejtë në më shumë se 120 vende të botës.  “, bëri të ditur më tutje USAID./21Media