Veseli bëri homazhe te varrezat e Jasharajve

Veseli bëri homazhe te varrezat e Jasharajve

Kryetari i Kuvendit të Kosovës, Kadri Veseli ka bërë homazhe tek varri i komandantit legjendar, Adem Jashari dhe familjes Jashari në Prekaz, për nder të “Epopesë së UÇK-së.

Me këtë rast, Veseli ka thënë se përulet me krenari para sakrificës së heronjve. Ai ka folur edhe për orientimin e shtetit të Kosovës, ku ka theksuar se Kosova është shtet i pavarur dhe sovran dhe se nuk i frikësohet askujt.

“Çdo vit vijmë përulemi me krenari para sakrificës së heronjve tanë. Pak ka në histori të popujve që individi dhe një ngjarje mund ta ketë ndryshuar historinë e kombit të vet. Ky është rasti më unikat në historitë botërore. ‘Epopeja e UCK-së’ me komandantin legjendar Adem Jashari me luftën e tij, me qëndrueshmërinë e tij dhe sakrificën e tij e ndryshoi,  i jepi rrjedha edhe ndryshimit të kombit tonë”, ka thënë Veseli.

Ndër të tjera, kryetari i Kuvendit ka shtuar se sot populli kosovar është krenar dhe bashkërisht po ecën përpara rrugën e forcimit të shtetit dhe integrimeve euroatlantike.

“Kosova është shtet i pavarur dhe sovran, nuk i frikësohemi askujt dhe Kosova do të jetë përjetë më e zhvilluar, më e fuqishme, më sovrane, më shtet për faktin se ka orientim të qartë, ka orientim të partneritetit, i partneriteti të fuqishëm me ShBA-të dhe Bashkimin Evropian, ka një orientim të qartë edhe të zhvillimit të vet, të gjithmbarshëm. Por, edhe fqinjësi të mirë me të gjithë fqinjët, ata që duan mirë kemi me shku mirë, ata që nuk na respektojnë as ne nuk kemi me i respektua”, ka theksuar Veseli.

Kreu i Kuvendit gjatë homazheve është shoqëruar nga kryetari i komunës së Skenderajt, Bekim Jashari, që është edhe pjesë e familjes Jashari, e për këtë Veseli ka thënë se nuk ka më mirë se 21 vite pas kësaj rënie të jetë kryetar i komunës nipi i komandantit, Adem Jashari.

Ndryshe, sot me fillim nga ora 15:30, Kuvendi i Kosovës do të mbajë senacë për shënimin e 21- vjetorit të Epopesë së Ushtrisë Çlirimtare të Kosovës.