Pranë shtëpive të familjeve Hoxha e Jakupi nga Ribari i Madh po qëndrojnë pjesëtarë të Policisë së Kosovës. Mëngjesin e sotëm këto dy familje u përleshen me armë zjarri, ku si pasojë një person ka vdekur, ndërsa gjashtë të tjerë janë plagosur. Ngjarja ka ndodhur sot rreth orës 07:00 në fshatin Hallaq i Madh, në Komunën e Lipjanit.

Por, fqinjët e tyre po shprehen të habitur, pasi që thonë se dy familjet nuk njihen për gjëra të tilla dhe se asnjëherë nuk kanë pasur probleme mes vete.

Bahti Terbeza, banor i fshatit Ribar i Madh ka thënë se familjen Jakupi e Hoxha e ka njohur që nga fëmijëria.

Për këto dy familje ai ka treguar se nuk kishin pasur asnjëherë konflikte, dhe se jetojnë shumë pranë tash e sa vjet.

“Këto dy familje janë afër këtu, kanë jetuar së bashku që sa vjet, nuk kanë pasur konflikt kurrë. Probleme nuk kanë pasur, ngjarja kish ndodh sot në mëngjes, kur dola në shitore e pash policinë këtu”, ka treguar ai.

Për këtë që ka ndodhur sot mes familjes Hoxha e Jakupi, ai ka thënë se është çuditur i gjithë fshati.

Sipas katunarëve kam dëgjuar për ngjarjen, por diçka saktë jo. Ne po çuditem edhe vet që ka ndodhur kjo, vet po çuditem se nuk kanë pasur konflikt kurrë“, ka thënë Terbeza.

Motivet e këtij konflikti ende nuk dihen, ndërsa rasti është duke u hetuar nga institucionet përkatëse.

Ndërkohë, që banorë të fshatit kanë treguar për KosovaPress se personi që është vrarë, është i familjes Jakupi, i cili kishte ardhur para pak ditëve nga Zvicra.

Zëdhënësja e Policisë në rajonin e Prishtinës, Flora Ahmeti, ka thënë se Policia e ka marrë informacionin sot rreth orës 07:00.

Sot rreth orës 07:00, policia ka marrë informacionin për një plagosje me arme zjarri në fshatin Hallaq i madh të Lipjanit. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të mbështetura edhe nga njësiti rajonal për hetimin e krimeve si dhe njësitë e tjera për ekzaminim të vendngjarjes”, tha Ahmeti.

Mjeku kujdestar në Klinikën Emergjente, Naser Syla, ka treguar se tre persona po trajtohen në mjekimin intensiv, si shkak i plagëve të rënda që kanë pësuar në pjesë të ndryshme të trupit. Ku sipas tij gjendja e këtyre të fundit është jo stabile. Një tjetër është liruar për tretman shtëpiak./KP