Lëvizja Vetëvendosje ka vazhduar publikimin e sondazheve pas rrëzimit të qeverisë Kurti. Kjo parti po vlerëson se nëse zgjedhjet do të mbaheshin në muajin qershor, partia e tyre do të fitonte 52.7%, apo 56 deputetë në Kuvendin e Kosovës. Ndërkaq, pasohet nga PDK-ja dhe LDK-ja me rreth 15%.

Në publikimin e sondazhit të realizuar nga kompania “Ubo Consulting”, nënkryetari Besnik Bislimi tha se marzha e gabimit mund të jetë plus-minus 3%.

“Kjo do të kishte qenë shpërndarja e ulëseve në parlament nëse zgjedhjet do të mbaheshin në qershor. Shihet një dominim i plotë i LVV-së. E thash edhe më herët se nëse bëhen të gjithë bashkë prapë janë pakicë, e shihni se PDK në sondazhe tashmë ka dal në vendin e dytë para LDK-së edhe pse kanë numër të njëjtë të ulëseve, por në përqindje janë 15.9 respektivisht 15.8%. AAK-ja është diku 8%, apo tetë ulëse. Lëvizja Vetëvendosje ka 52.7%, apo përkthyer në ulëse 56 ulëse”, tha ai.

Ai bëri të ditur se sondazhi është realizuar në muajin qershor.

“Ky hulumtim i ka 1060 respodentë, sondazhi është kryer nga i cili është institucioni më kredibil në Kosovë dhe rajon sa i përket hulumtimeve të opinionit publik. Është kryer nga data 6 deri më 16 qershor”, tha ai.

Sipas këtij sondazhi, lideri i VV-së Albin Kurti ka përkrahje prej 48% për të qenë kryeministër. Ndërsa, përkrahja ndaj qeverisë Hoti sipas tyre gëzon përkrahjen e vetëm 9% të qytetarëve./kp