Ministri i Shëndetësisë së Kosovës, Armend Zemaj ka paralajmëruar masa të reja të cilat tha se do t’i diskutojë me kryeministrin Avdullah Hotin.

“Rekomandimet e marra gjatë takimit të sotëm, do t’i diskutoj me kryeministrin z.Hoti në mënyrë që masat e marra nga Qeveria të prekin sa më pak ata dhe të jenë sa më të lehta për të gjithë ne”, ka shkruar Zemaj.

Ai përmes një shkrimi në llogarinë e tij “Facebook”, ka njoftuar se para marrjes së masave të reja ka takuar Berat Rukiqi kryetari e Odës Ekonomike të Kosovës, Arian Zeka kryetar i Odës Ekonomike Amerikane, Petrit Kllokoqi kryetar i Shoqatës së Gastronomëve si dhe Hysen Sogojeva kryetarin e Odës Hoteliere të Kosovës

“Secili nga ne ndjejmë përgjegjësinë për mbarëvajtjen e shëndetit publik dhe shëndetësisë, andaj është qenësore që të gjithë se bashku, nga aty ku veprojmë t’i zbatojmë rregullat për të parandaluar përhapjen e virusit sikurse dhe udhëzimet që dalin nga Manuali për Mbrojtje nga Përhapja e Covid19. Janë të arsyeshme shqetësimet e secilës kategori të shoqërisë sonë, por të gjithë së bashku duhet të mendojmë për shëndetin publik”, ka shkruar tutje Zemaj.

Edhe sot nga 1.794 mostra të marra brenda 24 orëve, 730 kanë rezultuar pozitiv, vetëm në Prishtinë janë 312 raste pozitive me Covid 19./21Media