Ministri i Shëndetësisë i Republikës së Kosovës, Armend Zemaj, priti sot në takim Abebayehu Assefa Mengistu koordinator për Ballkanin dhe Moldavinë i Organizatës Botërore të Shëndetësisë si dhe me zyrtarë të tjerë të kësaj organizate, me të cilët bisedoi rreth menaxhimit të situatës epidemiologjike në vend dhe në rajonin e Ballkanit.

“OBSh mbetet partner i yni strategjik në luftimin e pandemisë duke na qëndruar afër gjatë kësaj kohe dhe asistuar si në përgatitjen e Manualin për Mbrojtje nga përhapja e Covid-19, me donacione të rëndësishme, përfshirë këtu edhe aparaturën për RT-PCR, të sjellë së fundi me çka IKSHPK-së i janë shtuar kapacitet për testime molekulare për Covid-19”, tha Ministri gjatë këtij takimi.

Ai theksoi se me OBSh-në dhe partnerët tjerë po zhvillojnë aleanca edhe për sigurimin e vaksinave kundër Covid-19, kur të njëjtat të jenë aprovuar për përdorim.

Zemaj shprehu falënderimin për përkrahjen e rëndësishme që OBSh po i ofron Kosovës.

Sipas komunikatës për media nga Ministria e Shëndetësisë nga ana e tij Abebayehu Assefa Mengistu, e vlerësoi menaxhimin e pandemisë në Kosovë dhe theksoi nevojën e përkushtimit dhe solidaritetit midis popujve në përballimin e kësaj sfide globale të shëndetit publik.