Zgjedhjet në Spanjë nuk nxjerrin fitues, priten negociata të gjata për krijimin e Qeverisë

Partia konservatore e opozitës spanjolle ka siguruar numrin më të madh të vendeve në zgjedhjet kombëtare, por jo mjaftueshëm për të siguruar një shumicë të djathtë të koalicionit, pas një votimi që kishte ngritur frikën për hyrjen e së djathtës ekstreme në qeveri për herë të parë që kur vendi u kthye në demokraci pas vdekjes së gjeneralit Franko pesë dekada më parë.

Megjithëse sondazhet kishin parashikuar vazhdimisht se Partia Popullore (PP) konservatore e opozitës do të kalonte para Partisë Socialiste të Punëtorëve Spanjoll (PSOE) për të siguruar një fitore të theksuar në zgjedhjet e së dielës, rezultatet e hershme treguan se gara do të ishte shumë më e ngushtë.

Me 100% të votave të numëruara, PP kishte fituar 136 vende kundrejt 122 të PSOE-së. Partnerët e mundshëm të koalicionit konservator në partinë e ekstremit të djathtë VOX kishin marrë 33 vende – shumë më pak nga 52 që morën në zgjedhjet e fundit – dhe aleatët e PSOE-së u renditën në vendin e tretë.

Numërimi tregoi se ngjyrimi politik i qeverisë së ardhshme është larg një përfundimi të paramenduar, me bllokun e majtë dhe të djathtë në garën e tyre për të marrë sa më afër 176 mandate.

Negociatat nga të dy blloqet për të formuar qeveritë do të fillojnë pasi të mblidhet një parlament i ri më 17 gusht, shkruan Guardian, përcjell rtv21.tv.

Mbreti Felipe VI do të ftojë liderin e PP-së, Alberto Núñez Feijóo, që të përpiqet të sigurojë postin e kryeministrit. Në një situatë të ngjashme në vitin 2015, kreu i PP Mariano Rajoy refuzoi ftesën e mbretit, duke thënë se ai nuk mund të merrte mbështetjen.

Nëse Feijoo refuzon, mbreti mund t’i drejtohet kryeministrit, Pedro Sánchez, me të njëjtën kërkesë. Ligji nuk përcakton një afat për procesin, por nëse asnjë kandidat nuk siguron shumicën brenda dy muajve nga votimi i parë për kryeministrin, duhet të zhvillohen zgjedhje të reja. /21Media