U bisedua edhe për marrëdhëniet ndërmjet Kosovës dhe BERZH-it

U bisedua edhe për marrëdhëniet ndërmjet Kosovës dhe BERZH-it

Ministri i Financave, Bedri Hamza priti sot në takim presidentin e BERZH-it, Suma Chakrabarti. Në këtë takim u bisedua për marrëdhëniet ndërmjet Kosovës dhe BERZH-it, vazhdimin e bashkëpunimit financiar ndërmjet dy institucioneve, si dhe për implementimin e projekteve të cilat ndikojnë në zhvillimin ekonomik të Kosovës, në veçanti për projektet infrastrukturore, në sektorin e transportit, ujitjes dhe mbështetjen e skemës për garantimin e kredive.

Ministri Hamza duke i uruar mirëseardhje në Kosovë Presidentit të BERZH-it Chakrabarti falënderoi atë dhe Institucionin të cilin ai e drejton për gatishmërinë për të ndihmuar Kosovën përmes investimeve në projekte të rëndësishme për vendin, me theks të veçantë sektorin privat si bartës i zhvillimit ekonomik, si dhe shprehi nevojën për bashkëpunim të mëtutjeshëm ndërmjet dy institucioneve.  Ai gjithashtu e njoftoi Chakrabartin edhe për procesin buxhetor, politikat fiskale me dedikim për prodhimin vendor dhe për hapat që po merr Qeveria e Kosovës për zhvillimin ekonomik të vendit,  si dhe për masat të cilat janë marrë për rritjen e të hyrave buxhetore në Buxhetin e Kosovës. Po ashtu, gjatë takimit tha se bashkëpunimi ndërmjet Kosovës dhe BERZH-it ka qenë dhe është shumë i mirë, si dhe shprehu bindjen se ky bashkëpunim do të vazhdojë edhe në të ardhmen, sidomos në fushën e zhvillimit ekonomik dhe integrimit të vendit në BE.

Ndërsa, presidenti i BERZH-it, Suma Chakrabarti falënderoi Hamzën për pritjen dhe vlerësoi lartë punën dhe përkushtimin e tij për rritjen dhe bashkëpunimin ndërmjet Kosovës dhe BERZH-it.

Chakrabarti gjithashtu shprehu gatishmërinë e institucionit të cilin ai e drejton për të rritur edhe më shumë bashkëpunimin në fushat të cilat krijojnë një perspektivë integruese të Kosovës në BE,  në fushat të cilat ndikojnë në të bërit biznes si dhe në rritjen e mirëqenies së qytetarëve në Kosovë dhe integrimin rajonal.​/21Media