23 vjet nga rënia heroike e Ismet Jasharit – komandant Kumanova

Sot mbushen 23 vjet nga rënia e Komandantit të Ushtrisë Çlirimtare të Kosovës, Ismet Jashari – komandant Kumanova.
Ai është lindur në Orizare të Kumanovës më 16 prill 1967. Ai ishte i biri i Jashar Jasharit e i nënë Nuries. Mësimet fillore i ka marrë në vendlindje, ndërsa në vitin 1982 është regjistruar në Gjimnazin e Kumanovës.
Ismeti ishte ndër të parët që mori pjesë në themelimin e fondit ”Vendlindja thërret”. Ky fond është bërë bazë kryesore e logjistikës dhe e financimit të luftës së Ushtrisë Çlirimtare të Kosovës.
Menjëherë pas epopesë së Prekazit, më 5, 6 dhe 7 mars 1998, Ismet Jashari kishte bërë përgatitjet e fundit për të hyrë në Kosovë. Më 11 mars të po atij viti, ai, bashkë me Fehmi Lladrovcin, Xhevë Lladrovcin, Mirush Dakën, Bekim Berishën, Agim Bajramin e të tjerë, ishte futur në zonat ku ishte duke vepruar Ushtria Çlirimtare e Kosovës dhe kishte arritur në Likoc të Drenicës, ku asokohe ndodhej baza më e rëndësishme e UÇK-së.
Me vendim të Shtabit të Përgjithshëm të Ushtrisë Çlirimtare të Kosovës, Ismet Jashari ishte caktuar me detyrë ushtarake në zonën e Llapushës, me qëllim të zgjerimit dhe konsolidimit të radhëve të ushtrisë çlirimtare.
Më 23 gusht 1998, pasi ushtria armike kishte ndërmarrë të gjithat masat për të depërtuar në drejtim të Kleçkës, ku ndodhej edhe Shtabi i Përgjithshëm i Ushtrisë Çlirimtare të Kosovës, Ismet Jashari kishte organizuar rezistencën në pikën e tij të pamposhtur, në Bajrak të Luzhnicës.
Më 24 gusht në mbrëmje, luftëtarët e lirisë kishin depërtuar thellë në pozicionet armike, duke u shkaktuar dëme në njerëz dhe në teknikë lufte, luftëtarët Gani Kastrati dhe Afrim Buçaj, nuk kishin arritur të tërhiqeshin.
Në mëngjesin e hershëm të 25 gushtit, Ismet Jashari kishte kundërsulmuar befasishëm, në përpjekje për t’i marrë trupat e ushtarëve të rënë. Pas disa orë luftimesh, në një distancë të afërt, në altarin e atdheut, në Luzhnicë, ka rënë trimi ndër më të dalluarit e Ushtrisë Çlirimtare të Kosovës, Ismet Jashari – komandant Kumanova. Në altarin e atdheut kishin rënë edhe Nuhi Mazreku dhe Habib Zogaj.
Sot, trupi i dëshmorit Ismet Jashari prehet në kompleksin e Varrezave të Dëshmorëve në Kleçkë, ku pushojnë edhe trupat e 66 dëshmorëve të tjerë, të Brigadës 121 “Ismet Jashari-Kumanova”.