62 vjeçari mbijeton 16 orë në një varkë të përmbysur në Atlantik
Një 62-vjeçar francez mbijetoi për 16 orë në det duke përdorur një flluskë ajri brenda varkës së tij pasi ajo u përmbys.
Anija 12 metra, e cila ishte nisur nga kryeqyteti i Portugalisë, Lisbona, dërgoi një sinjal vonë të hënën në mbrëmje nga Oqeani Atlantik.
Rojet bregdetare spanjolle gjetën varkën e përmbysur, por deti ishte shumë i trazuar për ta shpëtuar – kështu që marinari duhej të priste deri në mëngjes.
Mbijetesa e burrit ishte “në kufijtë e së pamundurës”, thanë zhytësit e rojes bregdetare.
Varka e tij dërgoi një sinjal në orën 20:23 me kohën lokale të hënën, 14 milje (22.5 km) nga ishujt Sisargas, pranë rajonit veriperëndimor të Galicisë së Spanjës.
Një anije shpëtimi me pesë zhytës si dhe tre helikopterë u nis për të gjetur dhe shpëtuar njeriun, emri i të cilit ende nuk u bë i ditur.
Deti ishte i trazuar dhe dielli kishte perënduar, kështu që ekipi i shpëtimit i bashkoi varkës tullumbace lëvizëse për ta ndaluar atë nga fundosja dhe priti deri në mëngjes.
Të nesërmen, dy zhytës notuan nën varkë për të ndihmuar marinarin, të cilin e gjetën të veshur me një kostum mbijetese dhe të zhytur në ujë deri në gjunjë.
Burri më pas u hodh në ujin e ngrirë dhe notoi nën varkë drejt sipërfaqes së detit, shkruan BBC, përcjell rtv21.tv
Në një postim në Twitter, Shoqata e Sigurisë Detare dhe Shpëtimit të Spanjës tha: “Çdo jetë e shpëtuar është shpërblimi ynë më i madh”.
Vicente Cobelo, anëtar i ekipit të operacioneve speciale të rojes bregdetare, tha se marinari u fut në ujë “me iniciativën e tij”. Por, shtoi Cobelo, zhytësit ndihmuan ta nxirrnin marinarin, pasi e kishte të vështirë të dilte nga kostumi.
Ai u transportua me avion nga ekipi i shpëtimit dhe u dërgua për pak kohë në spital për kontrolle./21Media