95 vjeçarja akuzohet për mbi 10 mijë vrasje

 

Një grua 95-vjeçare e cila ka punuar për komandantin e një kampi nazist është akuzuar në Gjermani për ndihmën në vrasjen masive.

Gruaja, e quajtur në media si Irmgard F dhe që jeton në një shtëpi kujdesi në Pinneberg afër Hamburgut, akuzohet në lidhje me “më shumë se 10,000 raste”.

Ajo ishte sekretare e komandantit SS të Stutthof, një kamp brutal pranë Gdanskut të ditëve të sotme, ku rreth 65,000 të burgosur vdiqën gjatë Luftës së Dytë Botërore.

Është e paqartë nëse ajo do të përballet me gjyqin, transmeton rtv21.tv.

Roli i saj është ende duke u studiuar.

Kampi Stutthof u krijua në vitin 1939, në atë që ishte atëherë Polonia e okupuar nga nazistët dhe rojet filluan të përdorin dhomat e gazit në qershor 1944. Trupat sovjetike e çliruan atë në maj 1945, ndërsa lufta po mbaronte.

Rreth 100,000 të burgosur u mbajtën në Stutthof në kushte mizore, shumë vdiqën nga sëmundja dhe uria, disa nga gazi dhe të tjerëve iu dha injeksione vdekjeprurëse.

Shumë nga viktimat ishin hebrenj; kishte edhe polakë jo-hebrenj dhe ushtarë sovjetikë të kapur.

Një gjykatë për të miturit në Schleswig-Holstein tani duhet të vendosë nëse çështja duhet të gjykohet. Në kohën e krimeve ajo ishte nën 21 vjeç, kështu që llogaritej si e mitur.

Ajo ka pohuar se kurrë nuk e dinte që njerëzit po hidheshin me gaz në kamp.

Është një rast i pazakontë, pasi shumë pak gra janë gjykuar ndonjëherë për mizori në kampin nazist, dhe shumica e rasteve janë përqendruar në rojet e kampit, jo sekretarët, raporton BBC i Damien McGuinness nga Berlini.

Prokurorët kanë marrë në pyetje Irmgard F dhe filluan hetimin e të dhënave të saj SS në vitin 2016. Një prokurore gjithashtu intervistoi të mbijetuarit e Stutthof që tani jetojnë në Izrael.

Ajo akuzohet për “ndihmë dhe mbështetje të vrasjes në më shumë se 10,000 raste”, si dhe bashkëpunim në vrasje në tentativë.

Akuza thotë se ajo “ndihmoi ata që ishin përgjegjës në kamp në vrasjen sistematike të të burgosurve hebrenj, partizanë polakë dhe të burgosur rusë sovjetikë të luftës, në funksionin e saj si stenograf dhe sekretar i komandantit të kampit” midis qershorit 1943 dhe prillit 1945.

Ish-komandanti Paul Werner Hoppe u dënua me burg nëntë vjet në Bochum në vitin 1957.

Vitin e kaluar Bruno Dey, 93 vjeç, një ish roje Stutthof, mori një dënim me burg për dy vjet me kusht në Hamburg për bashkëpunim në vrasje masive. Në gjyqin e tij ai u kërkoi falje viktimave të Holokaustit./21Media