Tragjedi në resortin e skive në Gjeorgji, 12 persona vdesin në dhomat e gjumit

Dymbëdhjetë persona kanë vdekur nga helmimi me monoksid karboni në një vendpushim skish në Gjeorgji, ka thënë policia.

Trupat e 11 të huajve dhe një shtetasi gjeorgjian u gjetën në një zonë gjumi mbi një restorant në Gudauri, vendpushimi më i madh dhe më i lartë i skive në ish-shtetin sovjetik, sipas zyrtarëve.

Policia tha se “testet paraprake nuk tregojnë ndonjë gjurmë dhune në trupa” dhe dukej se ishte një incident, njoftoi agjencia e lajmeve AFP.

Një gjenerator me naftë ishte ndezur pasi ndërtesa humbi energjinë elektrike të premten, shtuan oficerët.

Trupat u zbuluan të shtunën në katin e dytë të një ndërtese ku ndodhet një restorant indian.

Autoritetet kanë hapur një hetim për ngjarjen dhe identiteti i viktimave nuk është bërë ende i ditur.

Gudauri është një destinacion popullor turistik për të apasionuarit pas skijimit dhe snowboardit, me një sërë aktivitetesh sportive dimërore për vizitorët e të gjitha niveleve.

Historia e saj daton në shekullin e 19-të kur njihej si një pikë tregtare në rrugën e lashtë ushtarake gjeorgjiane që lidh Rusinë me Gjeorgjinë.

Gudauri ndodhet në malet e Kaukazit në rajonin Mtskheta-Mtianeti në rreth 2,200 m mbi nivelin e detit dhe është rreth 120 km në veri të kryeqytetit të Gjeorgjisë Tbilisi./21Media