Cakolli: Ministrat s’janë larguar as nga objektet as nga vendimmarrja

Eugen Cakolli, nga KDI, ka theksuar se ish-ministrat që janë bërë deputetë në zgjedhjet e fundit s’janë larguar fizikisht nga objektet qeveritare, por as nga vendimmarrja ekzekutive.

Ai në një postim në Facebook, ka thënë se përderisa ngërçi në Kuvend po vazhdon me mos konstituimin e tij, bordet janë duke u mbushur me anëtarë, siç ka thënë ai, nga radhët e afërta të Vetëvendosjes.

”Ish-ministrat që janë betuar si deputetë, jo vetëm që s’janë larguar fizikisht nga objektet qeveritare, por as nga vendimmarrja ekzekutive. Ndërkohë që Kuvendi nuk po konstituohet, bordet po mbushen – kundërligjshëm dhe “normalisht” – nga anëtarë të përzgjedhur nga radhët e afërta të Vetëvendosjes. Rasti i fundit qenka ai i Këshillit Drejtues të Teatrit Kombëtar. Por ky s’është vendim teknik, as urgjent, e as rutinë e një (ish)ministri. Është vazhdim i planifikuar i kontrollit politik mbi institucionet, përmes nënshkrimeve të momentit të fundit. Pikërisht ajo për të cilën janë kritikuar të gjitha qeveritë e mëparshme. Pushteti nuk po qeveris më, por po siguron terren për pas-qeverisjen. Dhe gjithçka bëhet mbi një logjikë të qartë, por të mbrapshtë: “Për sa kohë nuk të ndalon dikush, s’ka pse ndalesh vetë”, ka shkruar Cakolli.