​Zjarr masiv në ndërtesën 67-katëshe në Dubai

Një zjarr i madh shpërtheu në orët e para të së shtunës në një kullë banimi 67-katëshe në Dubai Marina, e njohur si Kulla e Tigrit.

Flaka shkaktoi një reagim të gjerë emergjent, duke rezultuar në evakuimin e sigurt të mbi 3 mijë e 800 banorëve.

Autoritetet konfirmuan se nuk kishte të lënduar ose viktima gjatë incidentit, raporton KosovaPress.

Ekipet e Mbrojtjes Civile të Dubait punuan pa u lodhur për gjashtë orë për të kontrolluar zjarrin.

Zyra e Medias së Dubait (DMO) raportoi se evakuimi u përfundua pa incidente, por nuk dha detaje rreth shkaqeve të shpërthimit të zjarrit.

“Masat e kontrollit mbeten në fuqi dhe situata menaxhohet plotësisht nga ekipet e zjarrfikësve”, tha DMO.