Sulmet vazhdojnë, ministrat evropianë mblidhen në përpjekje për depërshkallëzim

June 20, 2025Përditesimi i fundit: June 20, 2025
Associated Press

(Lajm i përditësuar)

Makina të tëra digjen në Izraelin jugor pas sulmit të Iranit

Një raketë iraniane goditi Beershebën në Izrael  herët të premten, thanë shërbimet e emergjencës, një ditë pasi një raketë goditi një spital në të njëjtin qytet jugor. Irani tha se kishte synuar zyrën e Microsoft dhe zjarri që shpërtheu në qytet thuhet se ishte në rrugën ngjitur.

Shërbimi i shpëtimit Magen David Adom postoi një fotografi të asaj që dukej të ishte disa automjete në flakë në platformën X.

Tha se nuk ishin raportuar të lënduar, por media izraelite më vonë e citoi atë duke thënë se pesë persona kishin pësuar lëndime të lehta.

Sulmet vazhdojnë, ministrat evropianë mblidhen në përpjekje për depërshkallëzim

Sot në Gjenevë, ministrat e jashtëm evropianë priten të takohen me homologun e tyre iranian, Abbas Araghchi, në përpjekje për të ulur tensionet në krizën midis Iranit dhe Izraelit.

Nëse takimet shkojnë sipas planit, ato do të jenë bisedimet e para ballë për ballë midis Teheranit dhe qeverive perëndimore që kur Izraeli sulmoi Iranin një javë më parë, raporton BBC.

Ato do të shënonin gjithashtu përfshirjen më të rëndësishme evropiane në këtë krizë. Vonesa e papritur prej dy javësh e Presidentit Trump në marrjen e vendimit të tij nëse do të ndërhyjë ushtarakisht u jep këtyre diskutimeve në Gjenevë më shumë peshë – ai thotë se ende dëshiron t’u japë një shans negociatave.

Përpara se të shpërthente ky konflikt, SHBA-të kishin ndjekur bisedimet e tyre dypalëshe me Iranin për një marrëveshje të re bërthamore, duke lënë mënjanë Evropën e cila kishte luajtur një rol jetësor në marrëveshjen e vitit 2015 nga e cila Presidenti Trump u tërhoq gjatë mandatit të tij të parë.

Ndërkaq ministrat evropianë pritet t’i bëjnë thirrje Iranit të kthehet në tryezën e negociatave – Irani thotë se dëshiron ta bëjë këtë, por jo ndërsa është nën sulm.

Dhe, për momentin, as Izraeli dhe as Irani nuk po tërhiqen.

Izraeli dhe Irani shkëmbejnë më shumë sulme gjatë natës

Forcat Mbrojtëse Izraelite (IDF) thonë se kanë kryer dhjetëra sulme ajrore gjatë natës, duke synuar disa vende në Teheran me më shumë se 60 avionë luftarakë izraelitë.

Rreth 120 municione u përdorën për të kryer sulmet, të cilat shënjestruan vendet e prodhimit të raketave ushtarake dhe një qendër kërkimore bërthamore, të cilën ushtria izraelite thotë se ishte e përfshirë në zhvillimin e armëve bërthamore të Iranit, raporton BBC.

Gjatë natës, IDF tha gjithashtu se Irani kreu sulme ndaj Izraelit, me raportime për sulme në jug të vendit.
Irani nuk ka komentuar për këto sulme.

Ministri izraelit i përgjigjet Hezbollahut: Do të fshiheni nga faqja e dheut nëse përfshiheni

Ministri i Mbrojtjes i Izraelit, Israel Katz, ka thënë se Hezbollahut do të fshihet nga faqja e dheut nëse organizata nga Libani sulmon Izraelin në mbështetje të Iranit.

Sekretari i përgjithshëm i grupit militant Hezbollah, Sheikh Naim Qassem, ka thënë të enjten se grupi “do të veprojë siç e sheh të përshtatshme” në konfliktin mes Izraelit dhe Iranit.

Përmes një postimi në platformën X, Katz tha se sekretari i përgjithshëm i Hezbollahut nuk po e merr mësimin nga paraardhësit e tij dhe i njëjti sipas tij po kërcënon të veprojë kundër Izraelit në përputhje me urdhrat e diktatorit iranian.

“Sekretari i përgjithshëm i Hezbollahut nuk po e merr mësimin nga paraardhësit e tij dhe po kërcënon të veprojë kundër Izraelit në përputhje me urdhrat e diktatorit iranian. Unë sugjeroj që grupi libanez të jetë i kujdesshëm dhe të kuptoj se Izraeli e ka humbur durimin me terroristët që e kërcënojnë. Nëse do të ketë terrorizëm, nuk do të ketë Hezbollah”, ka shkruar Katz.

 

Tags
June 20, 2025Përditesimi i fundit: June 20, 2025
Back to top button