Irani sulmon bazën amerikane në Katar, nuk raportohet për viktima
(Lajm i përditësuar)
Trump falënderon Iranin për “njoftimin e hershëm” mbi sulmet me raketa dhe inkurajon Izraelin të ndalojë sulmet
Presidenti amerikan, Donald Trump falënderoi të hënën Iranin për “njoftimin e hershëm” pasi vendi sulmoi një bazë ajrore amerikane në Katar, duke shtuar se do të donte që Teherani të “vazhdonte drejt Paqes dhe Harmonisë në Rajon dhe do ta inkurajonte me entuziazëm Izraelin të bënte të njëjtën gjë”.
“Asnjë amerikan nuk u lëndua dhe mezi u shkaktua ndonjë dëm” në sulmin me raketa iraniane, shtoi Trump.
“Më e rëndësishmja, ata i kanë nxjerrë të gjitha nga ‘sistemi’ i tyre dhe, shpresojmë, nuk do të ketë më URREJTJE. Dua të falënderoj Iranin që na dha njoftimin e hershëm, gjë që bëri të mundur që të mos humbiste asnjë jetë dhe të mos lëndohej askush”, shkroi presidenti në një postim në Truth Social.
Në një postim të dytë në Truth Social, Trump falënderoi Emirin e Katarit për “gjithçka që ka bërë në kërkimin e Paqes për Rajonin”. Në një të tretë, presidenti shkroi: “URIME BOTË, ËSHTË KOHA PËR PAQE!”/21Media
Lideri suprem i Iranit thotë se nuk do të pranojë agresion nga askush
Udhëheqësi suprem i Iranit thotë në X se Irani nuk i ka bërë dëme askujt dhe nuk do të pranojë agresion “nga askush në asnjë rrethanë”.
Ajatollah Ali Khamenei thotë se Irani nuk do t’i nënshtrohet agresionit të askujt dhe kjo është “logjika” e kombit iranian./21Media
Vjen reagimi i Katarit
Qeveria e Katarit ka dënuar fuqishëm sulmin në Bazën Ajrore al-Udeid.
Majed al-Ansari, zëdhënës zyrtar i Ministrisë së Punëve të Jashtme, shkruan në X: “Ne e konsiderojmë këtë një shkelje flagrante të sovranitetit të Shtetit të Katarit, hapësirës së tij ajrore, ligjit ndërkombëtar dhe kartës së Kombeve të Bashkuara.”
Ai thotë se sistemet e mbrojtjes ajrore të Katarit “e penguan me sukses sulmin dhe interceptuan raketat iraniane” dhe baza ishte evakuuar më parë.
Ai shton: “U morën të gjitha hapat e nevojshëm për të siguruar sigurinë e personelit në bazë, përfshirë anëtarët e Forcave të Armatosura të Katarit, forcat mike dhe të tjerë.”
“Ne konfirmojmë se nuk ka pasur të lënduar ose viktima në njerëz nga sulmi.”
Zëdhënësi tha se Katari rezervon të drejtën për t’u përgjigjur “në një mënyrë ekuivalente me natyrën dhe shkallën e këtij agresioni të paturpshëm”./21Media
Irani sulmon bazën amerikane në Katar
Irani ka lëshuar gjashtë raketa drejt bazave amerikane në Katar, ka thënë një zyrtar izraelit për Axios.
Më herët u raportua se Katari ka pezulluar përkohësisht trafikun në hapësirën e tij ajrore.
Në një postim në mediat sociale nga Ministria e Jashtme e vendit, thuhet se kjo është pjesë e një sërë masash paraprake që po merren bazuar në zhvillimet në rajon.
Katari është shtëpia e bazës më të madhe ushtarake amerikane në Lindjen e Mesme, Bazës Ajrore Al Udeid. Rreth 8,000 qytetarë amerikanë jetojnë atje, sipas Departamentit të Shtetit.