Tre alpinistë kroatë humbin jetën nga orteku në Slloveni

Tre alpinistë nga Kroacia humbën jetën kur u rrëmbyen nga një ortek në Slloveninë fqinje gjatë fundjavës, thanë të hënën zyrtarët e shpëtimit.

Të tre u zhdukën të dielën kur një ortek i nxori nga një shteg në malin Tosc në Slloveninë veriperëndimore. Ata ishin pjesë e një grupi prej shtatë alpinistësh nga Kroacia, por u ndanë nga grupi për të ecur përpara në mal, i cili ndodhet 2,275 metra.

“Me keqardhje, mund të konfirmoj se të tre alpinistët që gjetëm kanë vdekur”, tha udhëheqësja e ekipit të shpëtimit Miha Arh, duke shtuar se alpinistët ishin varrosur thellë në dëborë në terrenin e thyer të Alpeve.

Ekipet e shpëtimit gjetën trupin e një alpinisti të dielën pasdite përpara se të pezullonin kërkimet për natën. Ata gjetën dy trupa të tjerë të hënën, thanë zyrtarët.

“Shpresonim lajme më të mira sot, por për fat të keq nuk është kështu” tha Ministri i Brendshëm kroat, Davor Bozinovic, i cili udhëtoi për në Slloveni gjatë kërkimit.

Moti i ftohtë gjatë fundjavës solli borë të parakohshme, erëra dhe temperatura të ulëta në Slloveni.

Autoritetet sllovene i kanë paralajmëruar vazhdimisht vizitorët të jenë të kujdesshëm në male dhe të shmangin ngjitjen në kushte të këqija atmosferike./21Media