Manipulime me vota edhe në Podujevë, aktivizohet prokuroria

Prokuroria Themelore në Prishtinë ka njoftuar se ka autorizuar Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsionit, për grumbullimin dhe administrimin e provave lidhur me dyshimet për kryerjen e veprave penale kundër të drejtave të votimit.

Sipas njoftimit, dyshimet kanë të bëjnë me parregullsi të mundshme gjatë procesit të numërimit të votave në komunën e Podujevës, konkretisht mospërputhje në numrin e votave të kandidatëve për deputetë në Kuvendin e Republikës së Kosovës, pas përfundimit të procesit të numërimit.

Hetimet po zhvillohen për vepra penale të parashikuara në Kapitullin XVIII të Kodit Penal të Republikës së Kosovës (KPRK), i cili trajton veprat penale kundër të drejtave të votimit.