Ellis: Kryerja e krimeve nga Policia Ushtarake nuk është provë që Krasniqi ka pasur kontribut
(Lajm i përditësuar)
Ellis: Kryerja e krimeve nga Policia Ushtarake nuk është provë që Krasniqi ka pasur kontribut
Avokati Aiden Ellis i cili përfaqëson Jakup Krasniqin, ka thënë se kryerja e krimeve nga anëtarët e Policisë Ushtarake nuk është provë që klienti i tij ka kontribuar në këto krime.
Ai tha se ka prova që anëtarët e Policisë Ushtarake kanë rrahur persona të ndaluar, dhe sipas tyre në rast që kanë ekzistuar rregulloret e pretenduara nga Prokuroria, atëherë ato janë shkelur, raporton “Betimi për Drejtësi“.
“Ka prova që disa anëtarë të Policisë Ushtarake kanë rrahur persona të ndaluar. Por, sa herë një anëtar i Policisë Ushtarake ka ushtruar forcën kundër një personi në ndalim, sipas nesh ka shkelur rregulloren në fjalë. Kryerja e krimeve nga anëtarë të Policisë Ushtarake nuk është provë sipas nesh që zoti Krasniqi të ketë luajtur rol në këto rregullore dhe ky rol të ketë pasur kontribut të konsiderueshëm në kryerjen e krimeve”, tha Ellis.
Avokati theksoi se në këtë çështje gjyqësore kanë qenë shumë dëshmitarë, duke përfshirë edhe 40 prej tyre anëtarë të UÇK-së.
Ai shtoi se përveç njërit dëshmitar, askush tjetër nuk ka thënë se ka parë rregullore të UÇK-së.
Mbrojtja e Jakup Krasniqit vazhdon deklaratën përmbyllëse në Hagë
Ekipi mbrojtës i Jakup Krasniqit do të vazhdojë sot me deklaratën përmbyllëse.
Mbrojtja e tij, e udhëhequr nga avokatja Venkateswari Alagendra ka nisur parashtrimet përfundimtare pasditen e së premtes.
Ajo ka thënë para trupit gjykues se klienti i saj po privohet padrejtësisht nga liria tash e pesë vjet.
Avokatja e Krasniqit tha se ekziston vetëm një opsion – që Krasniqi të shpallet i pafajshëm për të gjitha pikat e aktakuzës dhe të kthehet pranë familjes së tij.
Mbrojtja e Jakup Krasniqit ka një orë e gjysmë kohë për të përfunduar parashtrimet përfundimtare.
Pas kësaj, trupi gjykues për dy orë do të parashtrojë pyetje për palët. E më pas radhën e ka Zyra e Prokurorit të Specializuar për kundërpërgjigje.
Katërshja e UÇK-së do t’i drejtohet trupit gjykues të mërkurën me deklaratat përmbyllëse, secili nga 20 minuta.
Kjo shënon fazën përfundimtare të procesit më të madh gjyqësor në Dhomat e Specializuara të Kosovës në Hagë.
Kryeprokurorja e Specializuar, Kimberly West ka kërkuar dënim me burgim prej 45 vitesh, për secilin nga ish-krerët e UÇK-së.
Ekipet mbrojtëse të Hashim Thaçit, Kadri Veselit, Rexhep Selimit e Jakup Krasniqit kanë kërkuar që të njëjtit të shpallen të pafajshëm për të gjitha pikat e aktakuzës.
Ata kanë deklaruar para trupit gjykues se nuk ka asnjë provë që argumenton pretendimet e ZPS-së për krime lufte.
Hashim Thaçi, Kadri Veseli, Jakup Krasniqi dhe Rexhep Selimi, po përballen me akuza të ngritura nga Zyra e Prokurorit të Specializuar, të cilat ata i kanë cilësuar si të pabazuara. Edhe mbrojtja i ka hedhur poshtë këto akuza dhe ka argumentuar se UÇK-ja nuk kishte strukturë të organizuar komanduese.
Gjykimi ndaj tyre ka nisur më 3 prill 2023 – gati tri vjet pas konfirmimit të aktakuzës prej kur ish-krerët e UÇK-së mbahen në qendrën e paraburgimit në Hagë.