​Rama publikon shifrat e BTI: Shqipëria lider, Kosova me rezultate më të ulëta

Kryeministri i Shqipërisë, Edi Rama, ka publikuar të dhëna nga raporti ndërkombëtar “BTI 2026”, duke theksuar pozicionimin e Shqipërisë në krye të vendeve të Evropës Juglindore në disa indikatorë kyç.

Sipas renditjes së Indeksit të Transformimit të Bertelsmann Stiftung (BTI), Shqipëria renditet e para në rajon për transformimin politik me 7.70 pikë, duke lënë pas Maqedoninë e Veriut (7.65) dhe Malin e Zi (7.40). Kosova renditet në vendin e katërt me 6.90 pikë, ndërsa Bosnja dhe Hercegovina dhe Serbia pasojnë me 5.95 dhe 5.18 pikë.

Në aspektin e transformimit ekonomik, Shqipëria mban vendin e tretë me 7.11 pikë, pas Malit të Zi (7.50) dhe Maqedonisë së Veriut (7.18). Serbia renditet e katërta me 6.79 pikë, ndërsa Bosnja dhe Hercegovina dhe Kosova me 6.57 dhe 6.21 pikë.

Sa i përket qeverisjes, Shqipëria kryeson sërish rajonin me 6.71 pikë, e ndjekur nga Maqedonia e Veriut (6.07) dhe Mali i Zi (5.90). Kosova renditet e katërta me 4.81 pikë, ndërsa Bosnja dhe Hercegovina dhe Serbia mbeten në fund të listës.

Në publikimin e tij, Rama e ka cilësuar këtë raport si një vlerësim të rëndësishëm ndërkombëtar që nuk ka marrë vëmendjen e duhur në media, duke e quajtur “raport që nuk do ta gjeni në kanale e portale”.

Indeksi i Transformimit i Bertelsmann Stiftung (BTI) është një raport global që nga viti 2006 vlerëson çdo dy vjet cilësinë e demokracisë, zhvillimin ekonomik dhe nivelin e qeverisjes në 137 vende të botës. Vlerësimi bazohet në analiza të detajuara të përgatitura nga qindra ekspertë ndërkombëtarë dhe mbulon periudhën nga 1 shkurti 2023 deri më 31 janar 2025.

Ky indeks konsiderohet një nga instrumentet më të rëndësishme krahasuese për të matur kapacitetin e shteteve në proceset e transformimit politik dhe ekonomik.