“Jam ende gjallë”, Papa Françesku lirohet nga spitali

Papa Françesku  doli nga spitali në Romë pas një qëndrimi tre-ditor.

Ai u shtrua të mërkurën në spitalin Gemelli me vështirësi në frymëmarrje dhe më pas u diagnostikua me bronkit.

Vatikani kishte thënë më herët se Papa do të lirohej të shtunën nëse rezultatet e tij të fundit të analizave e lejonin këtë.

“Unë nuk u frikësova, jam ende gjallë,” u tha Papa, 86 vjeç, gazetarëve jashtë spitalit përpara se të largohej.

Ai u pa duke buzëqeshur dhe duke përshëndetur nga makina, përpara se të dilte për të folur me një turmë. Më pas ai u nis për në Vatikan.

Pranimi i Papës në spital erdhi përpara javës më të ngarkuar në kalendarin e krishterë për të festuar Pashkët.

Java e Shenjtë, siç dihet, përfshin një orar të ngjeshur ngjarjesh dhe shërbimesh që mund të jenë fizikisht kërkuese.

Papa argjentinas, i cili shënoi 10 vjet si kreu i Kishës Katolike në fillim të këtij muaji, ka vuajtur një sërë problemesh shëndetësore gjatë gjithë jetës së tij, duke përfshirë heqjen e njërës prej mushkërive në moshën 21-vjeçare./21Media