Haradinaj: Qeveria e fokusuar në grumbullimin e parave në thesarin e shtetit se sa në investime kapitale

Kryetari i Aleancës për Ardhmërinë e Kosovës (AAK), Ramush Haradinaj me rastin e Ditës Ndërkombëtare të Punës, ka thënë se Qeveria e Kosovës është më shumë e fokusuar në grumbullimin e parave në thesarin e shtetit se sa në investime kapitale e në zhvillimin e shtetit.

Haradinaj ka thënë se secilën ditë që kalon, vendi ynë është edhe më keq, punëtorët tanë më të diskriminuar, e qeveria edhe më e fjetur.

“Dita Ndërkombëtare e Punës kësaj here Kosovën e gjen në pozitën më të rëndë në 24 vitet e fundit. Secilën ditë që kalon, vendi ynë është edhe më keq, punëtorët tanë më të diskriminuar, e qeveria edhe më e fjetur”.

“Kryeministri dhe kabineti i tij qeveritar janë të fokusuar më shumë në grumbullimin e parave në thesarin e shtetit se sa në investime kapitale – aty ku hapen vende të reja pune, rriten rrogat dhe zhvillohet shteti”, ka shkruar Haradinaj në “Facebook”.

Haradinaj ka shpërfaqur frikën se Kosova po mbetet pa mjekë, pa mësimdhënës, madje edhe pa pjesëtarë të sigurisë.

“Fuqia punëtore po ikë çdo ditë, vendi ynë po mbetet pa mjekë, pa inxhinierë, ekonomistë e pa mësimdhënës. Kosova rrezikon me mbetë edhe pa pjesëtarë të sigurisë sepse rinia po ikë!”, ka shtuar Haradinaj.

I pari i AAK-së ka ftuar qeverinë që t’i ngritë pagat në sektorin publik dhe të gjejë modalitete edhe për ngritjen e pagave në sektorin privat.

“Ngritja e çmimit të tatimit në pronë, afatizimet dhe lojërat me pagesa të tatimit, duhet të anulohen dhe të mendohet edhe për qytetarët. Ftoj qeverinë që t’i ngritë pagat në sektorin publik, të gjejë modalitete për rritjen e pagave në sektorin privat, aty ku është goditja më e madhe nga inflacioni, si dhe më e rëndësishmja, të zhbllokojë buxhetin e shtetit”, tha ai.

“Ta bëjmë Kosovën një vend më të mirë për të jetuar!”, ka përfunduar Haradinaj.