AGK: Haxhiu ka sulmuar përnjëherë mediat dhe ka ndërhyrë në sistemin e drejtësisë
Asociacioni i Gazetarëve të Kosovës (AGK), ka reaguar pas njoftimit të Ministres së Drejtësisë, Albulena Haxhiut se e ka njoftuar prokurorinë për lajmin që publikoi dje televizioni publik nga një gazetë boshnjake.
”Skandaloz deklarimi i Ministres Haxhiu për “lëndën” në Prokurori kundër medieve Asociacioni i Gazetarëve të Kosovës është i shokuar me deklaratat e Ministres së Drejtësisë, Albulena Haxhiu, për “dorëzimin e lajmit”, në Prokurori për akuzat ndaj dy portaleve kosovare”, thuhet në reagimin e AGK-së.
Tutje AGK-ja, ka ftuar Haxhiun që të përmbahet nga deklarata të tilla, dhe nga partia e saj të ndalë fushatën e ”rrezikshme akuzuese kundër gazetarëve”.
”Zonja Haxhiu ka thënë pas përfundimit të një interviste në Prokurori se: “Ju e keni parë një lajm në RTK, ku në këtë rast është përmendur Nacionalja dhe Periskopi, u publikua në RTK, unë i kam dhënë informacione edhe Prokurorisë në lidhje me këtë lajm. Kjo është media kredibile. Unë i kam ofruar para prokurorisë ato që i kam parë edhe vetë.” Nëpërmjet kësaj deklarate skandaloze, zonja Haxhiu, ka sulmuar përnjëherë mediat dhe ka ndërhyrë në sistemin e drejtësisë”, thuhet në reagimin e AGK-së./21Media
Dëshiron ta dëgjosh këtë lajm me zë?