Aktakuzë ndaj personit që kanosi rëndë deputetin Avdullah Hoti

Prokuroria Themelore në Prishtinë ka ngritur aktakuzë ndaj një të pandehuri me inicialet R.S., pasi i njëjti kanosi deputetin Avdullah Hoti përmes një komenti në Facebook, duke shkruar”Ty mor bugar vetëm kosa të vjen hakesh”.

“Sipas aktakuzës, më 15.12.2022 në Prishtinë, pasi i dëmtuari A.H., deputet i Kuvendit të Republikës së Kosovës, kishte postuar në profilin e tij në rrjetit social “facebook” mendimin e tij për zhvillimet politike në vend, i pandehuri i lartcekur, me qëllim të frikësimit, e përmes llogarisë së tij personale në rrjetin social “facebook”, i shkruan koment që lidhet me punën apo me pozitën e të dëmtuarit dhe e kanosë seriozisht me fjalët: “Ty mor bugar vetëm kosa të vjen hakesh”, ku me këtë rast tek i dëmtuari shkakton ndjenjën e ankthit, frikës dhe pasigurisë për jetën, andaj me këtë i pandehuri kryen veprën penale të kanosjes”, thuhet në komunikatën e prokurorisë.

Prokurori i Shtetit me rastin e ngritjes së aktakuzës i ka propozuar Gjykatës që i pandehuri të shpallet fajtor dhe të dënohet sipas ligjit për veprën penale e cila i vihet në barrë. /21Media