Ambasadori Isufaj bënë homazhe te Memoriali 9/11
Ambasadori i Kosovës në New York, Frymëzim Isufaj i shoqëruar nga stafi i Konsullatës së Përgjithshme të Kosovës në New York, kanë bërë homazhe te Memoriali 9/11.
Me vendosjen e një kurore lulesh pranë këtij Memoriali, u kujtuan 2977 viktimat e sulmit terrorist në Kullat Binjake, njëzet vjet më parë.
“Bota e qytetëruar i dha terrorizmit goditjen e duhur atëherë, ndërkaq, sot, përkujtimi i viktimave simbolizon vullnetin e mirë për paqe e tolerancë. Populli i Kosovës ndan dhimbjen e madhe me familjet që humbën më të dashurit e tyre në këtë sulm”, thuhet në njoftimin e Konsullatës së Përgjithshme të Republikës së Kosovës.
Shtetet e Bashkuara, por edhe mbarë bota dje përkujtuan 20-vjetorin e sulmeve të përgjakshme të 11 shtatorit 2001. Sulmi ndaj kullave binjake ishte kryer me 11 shtator 2001 nga një grup prej 19 vetash rrëmbyes radikalë, 15 prej të cilëve ishin nga Arabia Saudite, dy nga Emiratet e Bashkuara Arabe, një nga Egjipti dhe një nga Libani./21Media