Arrestohen katër persona për abuzim racor ndaj Vinicius

Katër persona janë arrestuar në lidhje me abuzimet racore ndaj yllit të Real Madridit, Vinicius Junior në muajin janar, ka njoftuar policia spanjolle.

Një hetim për krimin e urrejtjes u nis nga policia pasi një kukull e fryrë, e veshur me një fanellë të Vinicius Jr, u shfaq nën një nga urat në kryeqytetin spanjoll.

Figura ishte varur përkrah një pankarte ku shkruhej: “Madridi e urren Real Madridin”.

Incidenti në fjalë ndodhi para përballjes së Real Madridit në Kupën e Mbretit kundër Atletico Madridit.

Policia spanjolle e ka konfirmuar arrestimin e katër personave nga një grup i ultrasëve, me tre prej tyre të cilët më parë ishin identifikuar gjatë ndeshjeve të klasifikuara si me rrezik të lartë.