Arrestohet një i dyshuar për falsifikim të parasë

Sekuestrohen para dhe materiale të tjera

Sot, rreth orës 14:00, Drejtoria për Hetimin e Krimeve Ekonomike dhe Korrupsionit, konkretisht Njësia për Hetimin e Krimeve Ekonomike dhe Korrupsion në Prishtinë, me kërkesë të Drejtorisë për Hetimin e Narkotikëve, ka ndërmarr një operacion kontrolli (bastisjeje) të një e shtëpie të banimit dhe objekteve përcjellëse të dyshuarit (B.SH.) e cila gjindet në fshatin Sllatinë e madhe-Fushë Kosovë.

Gjatë kontrollit të shtëpisë (konkretisht në dhomën e fjetjes në shtëpinë e personit të dyshuar), Policia ka hasur në një sasi të parave në bankënota të ndryshme, në total prej 3830 euro, të cilat dyshohet se janë të falsifikuara.

Po ashtu në vendin e ngjarjes janë hasur edhe gjësende tjera si:

Një pajisje për ngjitjen e shiritave të parave (User Manual Tipper Machine)

Shirita të kartëmonedhave 50€,

Shirita të kartëmonedhave 100€,

Një sasi e shenjave të sigurisë së parave (si holograme, kinograme, shirita të sigurisë),

Dhe një sasi e materies së lëngët (kimikate) që përdoret për pastrim parash.

Të gjitha gjësendet për të cilat dyshohet se janë të kundërligjshme (duke përfshirë edhe paratë), janë fotografuar, evidentuar dhe sekuestruar në vendin e ngjarjes nga Njësia e Forenzikës. Personi i dyshuar (B.Sh.) është shoqëruar në Polici, me ç’rast është intervistuar në cilësin e personit të dyshuar.

Personi i dyshuar është dërguar në mbajtje prej 48 orëve për procedura të mëtejme./21Media