ATK inkanson mbi 1 miliard euro tatime gjatë vitit 2025

Administrata Tatimore e Kosovës ka inkasuar mbi 1 miliard euro tatime gjatë vitit 2025, duke shënuar rritje prej 58 milionë euro apo 6 për qind krahasuar me vitin e kaluar.

Këto të dhëna u bënë të ditura në konferencën vjetore të ATK-së.

Ministri në detyrë i Financave, Hekuran Murati, tha se kjo arritje reflekton rritjen e aktivitetit ekonomik dhe përmirësimin e përmbushjes tatimore

“Një nga treguesit e kësaj performance është edhe tejkalimi i shifrës prej 1 miliard euro të hyrat nga tatimet apo të mbledhurat nga ATK, fakt që e dëshmon se është një rritje e vazhdueshme e besimit të qytetarëve në institucionet tona. Shifra prej 1 miliard euro për herë të parë në historinë e ATK-së është mbledhur apo është përmbushur me 16 dhjetor të këtij viti. Ende pa u mbyllur viti është shënuar rekord historik. Kjo shifër nuk është e rastësishme sepse ngjashëm ka performuar edhe aspekti ekonomik. Kemi biznese që këtë vit pritet ta mbyllin me rreth 25 miliard euro qarkullim, ndërsa para pesë viteve ishte 11.5 miliardë euro. Nuk është rritur vetëm qarkullimi por kemi edhe rritje të fitimit të bizneseve. Nëse marrim për bazë tatimin në fitimin e korporatave, pra si indikator e shohim që fitimi bizneseve tashmë ka tejkaluar shifrën prej 2 miliardë euro, pra pritet të jetë 2.3 miliardë euro, ndërsa para pesë vitesh ka qenë rreth 900 milionë euro. Ngjashëm kemi të bëjmë edhe me trendin e numrit të të punësuarve. Shifra e të punësuarve në muajt e fundit tregon që ka arritur, apo ka prekur numrin prej 435 mijë vende pune aktive që kanë të raportuara në ATK, kurse para pesë vitesh ishte 350 mijë”, tha Murati.

Ndërkaq, drejtori i ATK-së, Mentor Hyseni, tha se kjo arritje është realizuar pavarësisht mungesës së stafit në këtë institucion.

” Sot gjendja është mbi 1 miliardë që ATK ka realizuar gjatë këtij viti. Është meritë e juaja duke pas parasysh që ATK po përballet me mungesë të numrit të puntorëve, që sillen diku rreth 30 për qind, e me një moshë mesatare që kalon 51. Megjithatë për shkak të këtyre mungesave ARK ka arrit të krijojë të hyra që kalon 1 miliardëshin”, ka thënë ai.

Sipas ATK-së, kontributet pensionale kanë arritur vlerën 354 milionë euro, ndërsa në total tatimet dhe kontributet kanë shkuar në 1.366 miliardë euro.

Gjatë vitit 2025, ATK ka zhvilluar mbi 24 mijë kontrolle përmbushëse, me mbi 7 mijë vizita në terren, duke rezultuar me 86.3 milionë euro tatim shtesë (tatim, ndëshkime dhe interes). Po ashtu, janë shqiptuar mbi 23 mijë gjoba, përfshirë mbi 11 mijë gjoba mandatore, me vlerë totale rreth 3 milionë euro.

Në kuadër të luftimit të informalitetit dhe shmangies tatimore, ATK ka identifikuar mbi 240 mijë tatimpagues aktivë, prej tyre mbi 140 mijë biznese dhe mbi 99 mijë persona fizikë jo afaristë. Gjithashtu, janë regjistruar mbi 1 mijë punëtorë, ndërsa numri mesatar i punëtorëve të deklaruar përmes formularëve ka kaluar 452 mijë.

Po ashtu, janë zhvilluar 88 aktivitete për shmangie tatimore, janë iniciuar 19 kallëzime penale, ndërsa janë përgatitur 41 raporte informuese për Prokurorinë.

ATK ka bërë të ditur se gjatë vitit 2025 ka fiskalizuar mbi 2 mijë biznese të reja, ka instaluar mbi 4 mijë pajisje elektronike fiskale, si dhe ka trajtuar mbi 5 mijë kërkesa për rimbursim./kp