ATK njofton rreth rimbursimit të kuponëve fiskal

Fituesit potencial do të rimbursohen me 10% të vlerës së deklaruar, por jo më shumë se 100 euro

Administrata Tatimore e Kosovës njofton rreth aplikimit për rimbursim nga kuponët fiskal për TM4/2017, për muajt tetor, nëntor, dhjetor  të vitit 2017.

Sipas një njoftimi të ATK-së, aplikimi për rimbursim të mjeteve nga grumbullimi i Kuponëve Fiskal për periudhën e lartëcekur fillon nga data 01 janar 2018 deri me 31 janar 2018.

”Aplikimi bëhet duke  plotësuar aplikacionin për rimbursim të mjeteve nga grumbullimi i Kuponëve Fiskal. Aplikacioni duhet të plotësohet në mënyrë elektronike përmes ueb-faqes së Administratës Tatimore të Kosovës www.atk-ks.org në linkun Shërbime Elektronike – Aplikacioni për Kuponë Fiskal. Aplikimi bëhet vetëm një herë për të njëjtën periudhë duke u bazuar në Numrin Personal të aplikuesit”, njofton ATK.

Fituesit potencial, sipas komunikatës do të rimbursohen me dhjetë përqind (10%) të vlerës së deklaruar, por jo më shumë se  njëqind euro (100 €). Numri minimal i kuponëve fiskal të dorëzuar duhet të jetë 60 kuponë, me shumën minimale dyqindepesëdhjetë euro ( 250€ ).

”Numri Potencial Fitues do të gjenerohet nga sistem i ATK-së në bazë të një algoritmi të përcaktuar nga ATK, duke u bazuar në numrin e plikos, emrin dhe mbiemrin (në rastet kur qytetari posedon dy mbiemra do të merret për bazë vetëm i pari) e qytetarit”, njofton ATK, duke shtuar se pas përfundimit të afatit të aplikimit, në njërën nga datat 1 deri më 10 të muajit pasues do të organizohet tërheqja fitueseve përmes Televizionit Publik të Kosovës.

”Pas përfundimit të procesit të tërheqjes së Numrave Potencial Fitues, qytetaret të cilët posedojnë Numrin Potencial Fitues të përzgjedhur nga tërheqja, plikon me kuponë fiskal së bashku me të dhënat e aplikimit duhet të dorëzojnë fizikisht të mbyllur, në njërën nga Drejtoritë Regjionale të ATK-së, brenda afatit prej pesë (5) ditë pune pas publikimit të listës në web faqe të ATK-së”, njofton më tutje ATK./21Media