Boris Johnson sërish në Kiev, takohet me presidentin Zelensky

Ish-kryeministri britanik, Boris Johnson u kthye në Kiev të dielën ndërsa vendi shënoi Ditën e Unitetit të Ukrainës dhe udhëtoi në Bucha dhe Borodianka me kreun e administratës ushtarake rajonale të Kievit, Oleksii Kuleba.
Ish-kryeministri i Mbretërisë së Bashkuar u pa duke mbajtur shënime gjatë vizitës në Borodianka, të cilën rusët e pushtuan për një muaj në fillim të luftës. I pyetur nga Johnson se sa nga ata që kishin ikur nga qyteti ishin kthyer, Kuleba tha se popullsia është kthyer në rreth 60% të asaj që ishte para luftës.
Johnson vizitoi një ekspozitë kushtuar masakrës së Buçës, vendosi lule në një varr masiv dhe tha se “MB do të qëndrojë pranë Ukrainës për aq kohë sa të nevojitet”.
Ai gjithashtu u takua me presidentin ukrainas Volodymyr Zelensky në Kiev për të premtuar mbështetjen e tij të vazhdueshme dhe për të pyetur se si mund të ndihmonte Ukrainën.
Johnson e informoi Zelenskyn për vizitën e tij në Borodianka dhe Bucha më herët atë ditë, duke e përshkruar atë që ai e pa si “të tmerrshme”.
Zelensky falënderoi Johnson, i cili vizitoi vendin disa herë gjatë kohës së tij si kryeministër, për mbështetjen e tij në një postim në Telegram duke e quajtur atë “një mik të vërtetë të Ukrainës”.
Dita e Unitetit të Ukrainës shënon përvjetorin e bashkimit midis Republikës Popullore të Ukrainës dhe Republikës Popullore të Ukrainës Perëndimore, nënshkruar më 22 janar 1919.
Johnson u bë një nga mbështetësit më të zëshëm të Ukrainës gjatë mandatit të tij dhe u pa si një aleat i veçantë në Kiev. Ai ishte një nga liderët e parë të huaj që vizitoi kryeqytetin ukrainas në fillim të prillit dhe u kthye dy herë të tjera ndërsa ishte ende kryeministër në qershor dhe në gusht për Ditën e Pavarësisë së Ukrainës./21Media