Burim Ramadani: Dihet kush janë ata që për motive politike e fyen, e poshtëruan Policinë e Kosovës

Ish-kryeinspektori i AKI-së, Burim Ramadani pas vdekjes së 27-vjeçarit Agon Zejnullahu në duart e policisë në Lipjan, javën e kaluar, ka kujtuar fushatën e vitit 2007 për promovimin e Policisë së Kosovës, me moton “Njerëzit sikur ju, në shërbimin tuaj”, të realizuar nga MPB me mbështetje të OSBE-së.

Ramadani ka thënë se në atë kohë u vendosën për herë të parë shtesat për rrezikshmëri për Njësitë Speciale dhe se shumë zyrtarë policorë kanë kontribuar për ndërtimin e një force profesionale.

“Kosova nuk ka lindur sot. Policia nuk është krijuar sot. Dihet kush e ka fyer, poshtëruar dhe sulmuar Policinë – jo për arsye etnike, por për qëllime politike”, ka shkruar Ramadani ne Facebook.

Tutje Ramadani ka ngritur shqetësime për mungesën e sigurimeve shëndetësore, pagat e ulëta, trajnimet e reduktuara dhe pajisjet e paplota, duke kërkuar mbështetje të plotë për Policinë.

“Fatkeqësisht, policët nuk kanë Sigurime Shëndetësore as sot. Ata dhe ato vuajnë nga pagat më të ulëta, e që rreth 6 vjet më parë kishin pagat më të larta në rajon.
Kohëzgjatja e Trajnimit Bazik është përgjysmuar, sikurse edhe kohëzgjatja e Trajnimit Fushor. Pajisjet individuale të domosdoshme nuk janë të kompletuara, ndërsa ndikimi politik mbi autonominë operacionale të Policisë është konstatuar edhe nga partnerët ndërkombëtarë, kryesisht amerikanë”, ka shkruar Ramadani.