Dalai Lama: Rreth datëlindjes së 90-të do të them nëse dhe ku do të rimishërohem

Dalai Lama sot tha se po rikuperohet nga operacioni në gju dhe ndihet fizikisht mirë, duke hedhur poshtë thashethemet për shëndet të keq në ditëlindjen e tij të 89-të.

“Kohët e fundit kam bërë një operacion në gju, i cili më ka shkaktuar probleme. Megjithatë, po shërohem dhe tani nuk kam asnjë problem”, tha udhëheqësi shpirtëror i budizmit tibetian në një video-mesazh nga SHBA, ku po shërohet.

“Mund të ketë njerëz që përpiqen t’ju ngatërrojnë për shëndetin tim, duke thënë se Dalai Lama ka shkuar në spital dhe po merr trajtim e kështu me radhë, gjë që e bën gjendjen time të tingëllojë serioze. Mos i besoni këto dezinformata,” tha ai.

Një figurë karizmatike që popullarizoi budizmin ndërkombëtarisht, Dalai Lama fitoi Çmimin Nobel për Paqe në 1989 për ruajtjen e mbështetjes për Tibetin në mërgim. Ai iku në Indi në vitin 1959, nëntë vjet pasi Kina dërgoi trupa në rajonin e Himalajeve në vitin 1950, duke thënë se po çlironte “bujkrobërit” tibetianë.

Ndërsa lideri shpirtëror plaket dhe lufton me probleme shëndetësore, emërimi i pasuesit të tij është bërë një çështje kryesore për tibetianët që luftojnë për autonomi më të madhe në Kinë ose pavarësi të plotë. Budistët tibetianë besojnë se murgjit e ditur rimishërohen si të porsalindur pas vdekjes.

Dalai Lama ka thënë se rreth datëlindjes së tij të 90-të, ai do të sqarojë çështjet e trashëgimisë, duke përfshirë nëse dhe ku do të rimishërohet.

“Tani jam pothuajse 90-vjeç, por nuk ndihem i sëmurë, përveç një shqetësimi të lehtë në këmbë. Dëshiroj të falënderoj të gjithë bashkëqytetarët e mi që jetojnë në Tibet dhe jashtë Tibetit për lutjet e tyre në ditëlindjen time,” tha ai, duke shtuar se disa nga problemet e tij janë pjesë e plakjes.

Sot, dhjetëra-mijëra budistë dhe dashamirës në mbarë botën do të mblidhen për të festuar dhe lutur për jetën e gjatë të liderit që përfaqëson për ta shpresën më të fortë për një kthim eventual në Tibet.