Dy sirianë të therur me thikë gjenden në Leposaviq

Dy sirianë të therur me thikë janë gjetur të mërkurën në fshatin Koshuticë të Leposaviqit në vende të ndryshme.

Rasti është cilësuar si vrasje në tentativë.

Njëri, rreth 40-vjeçar, është gjetur në oborrin e një shtëpie.

“Dy dëshmitare femra kosovare, kanë raportuar se në oborrin e shtëpisë së tyre  kanë  vërejtur një person të shtrirë  me plagë nëpër pjesë të ndryshme të trupit të shkaktuara nga mjeti i mprehtë. Viktima mashkull i moshës rreth 40-vjeçar, shtetas i Sirisë është dërguar për tretman mjekësor në Spitalin e Mitrovicës Veri dhe më pas është transferuar në Spitalin e Mitrovicës Jugu për trajtim të mëtutjeshëm”, thuhet në raportin policor.

Ndërkohë që tjetri është gjetur nga njësiti i Policisë gjatë patrullimit në fshat Koshuticë.

“Rreth orës 11:05  jemi njoftuar se njësiti nga SPMK Jarinje gjatë patrullimit në fshatin Koshuticë ka vërejtur një person mashkull Sirian i moshës 27-vjeçar me lëndime në kokë dhe këmbë  që dyshohet se plagët janë shkaktuar nga  mjeti i mprehtë”, thuhet në njoftim.

Viktima thuhet se ka njoftuar se i dyshuari është larguar në drejtim të kufirit të Serbisë.