E vranë mësuesen, adoleshentët do të gjykohen si të rritur

Dy adoleshentë të Iowa-s janë akuzuar për vrasjen e mësueses pasi policia zbuloi postime inkriminuese në mediat sociale.
Nohema Graber, 66 vjeç, u gjet e vdekur në një park në qytetin Fairfield, disa orë pasi u raportua e zhdukur, thanë autoritetet.
Policia thotë se të dyshuarit kanë postuar detaje të vrasjes, përpjekjet për ta fshehur atë dhe një motiv të mundshëm në mediat sociale.
Adoleshentët, të dy 16 vjeç, do të gjykohen si të rritur për vrasjen.
Sipas dokumenteve të gjykatës, Graber ishte raportuar e zhdukur të mërkurën në mëngjes.
Policia më vonë zbuloi trupin e saj në një park në Fairfield, një qytet me pak më shumë se 9,000 banorë që ndodhet 150 km nga kryeqyteti i shtetit, Des Moines. Ajo ishte e njohur që frekuentonte parkun.
Hetuesit më vonë kontrolluan shtëpitë e adoleshentëve dhe mblodhën rroba, disa prej të cilave dukej se kishin gjurmë gjaku, transmeton rtv21.tv.
Një dëshmitar gjithashtu i tha policisë se i kishte parë adoleshentët në park një ditë para se Graber të raportohej e zhdukur.
Deri më tani nuk janë bërë të ditura detaje rreth motivit të mundshëm.
Graber, një mësuese me origjinë meksikane, ishte punësuar në shkollën e mesme Fairfield që nga viti 2012, tregon faqja e internetit e distriktit shkollor. Të dy adoleshentët ishin studentë atje.
Nxënësit e shkollës u pushuan herët të enjten dhe mësimet u anuluan të premten.
Seancat preliminare për dy të akuzuarit janë caktuar për 12 nëntor.
Ligji i Iowa-s lejon që rastet e të miturve nga mosha 14 vjeç të transferohen në gjykatat e të rriturve./21Media