Ekzekutohen pagat për sektorin publik, Murati: Festoni me produkte vendore

Janë ekzekutuar sot pagat e muajit dhjetor për sektorin publik. Kështu ka njoftuar përmes një postimi në Facebook, ministri i Financave Hekuran Murati.

“Sot kemi ekzekutuar edhe pagat e muajit dhjetor për sektorin publik, duke përmbyllur kështu vitin fiskal sa i përket shpenzimeve. Nëse llogarisim edhe shtesat që u ekzekutuan para dy ditësh, janë rreth 140 milionë euro pagesa të bëra në llogaritë e qytetarëve, vetëm këtë javë. “, ka shkruar ai.

Më tej Murati ka porositur që qytetarët të blejnë produkte vendore.

“Do të ishte mirë që secili prej nesh të japim kontribut në forcimin e ekonomisë duke blerë sa më shumë prodhime vendore, sidomos në kohë festash si tani. Sa më shumë produkte vendore që blejmë, aq më shumë rritet punësimi e ekonomia. E kjo pastaj na mundëson që të rrisim buxhetin, e me më shumë buxhet rriten edhe pagat dhe mbështetja për të gjithë qytetarët.”, ka përfunduar ai./21Media