Fillon seanca e përbashkët Kosovë – Shqipëri
(Lajm i përditësuar)
Ka nisur seanca e përbashkët e dy kuvendeve të Kosovës dhe Shqipërisë në Kuvendin e Kosovës.
Në fillim të seancës janë intonuar Himni i Kosovës dhe ai Kombëtar.
Në seancë po marrin pjesë edhe kryeministrat Edi Rama dhe kryeministri Albin Kurti.
Gjithashtu, në Kuvend sot është edhe presidentja Vjosa Osmani.
Deputetët nga Kosova e Shqipëria mblidhen në Parlamentin e Kosovës
Deputetë të Kosovës e të Shqipërisë janë bashkuar sot në Prishtinë.
Para nisjes së seancës është zhvilluar një takim i përbashkët në mes të kryeparlamentarit të Kosovës, Glauk Konjufca, kryeparlamentares së Shqipërisë, Elisa Spiropali, kryeministrit të Kosovës Albin Kurti e atij të Shqipërisë, Edi Rama.
Që të gjithë pritet që në seancë t’u drejtohen deputetëve.
Kurti e Rama bashkohen në zyrën e Konjufcës
Delegacioni i Shqipërisë ka arritur në Kosovë për mbledhjen e përbashkët të Kuvendit .
Fillimisht dy delegacionet ai i Kosovës dhe i Shqipërisë janë takuar në zyrën e kryetarit të Kuvendit të Kosovës, Galuk Konjufca.
Kurti e Rama hyjnë ndaras në Kuvend
Në Kuvendin e Kosovës ka mbërritur edhe Kryeministri i Shqipërisë, Edi Rama. Menjëherë pas tij në objektin e Kuvendit hyri edhe kryeministri i Kosovës, Albin Kurti.
Edhe pse Rama kalojë nëpër oborrin e Qeverisë dhe kishin 1 minutë kohë diferencë nga arritja, ata nuk zgjodhen që hyrjen në Kuvend ta bënin bashkë.
Fillon ardhja e delegacioneve nga Parlamenti i Shqipërisë
Ka filluar ardhja e delegacioneve nga Parlamenti i Shqipërisë. Në Kuvendin e Kosovës ka mbërritur edhe Kryetarja e Kuvendit të Shqipërisë, Elisa Spiropalli, ku u prit nga homologu i saj kosovar, Glauk Konjufca.
Kuvendi i Kosovës dhe Shqipërisë sot me mbledhje të përbashkët
Sot në ora 11:00, mbahet seanca e përbashkët ndërmjet Kuvendit të Republikës së Kosovës dhe Kuvendit të Republikës së Shqipërisë.
Sipas agjendës është parashikuar që pas himneve të të dyja vendeve, mbledhja të nisë me fjalën e kryeparlamentarit të Kosovës, Glauk Konjufca dhe pas tij do të flasë kryeparlamentarja e Shqipërisë, Elisa Spiropali.
Kjo mbledhje e përbashkët do të përmbyllet me fjalim të Albin Kurtit dhe Edi Ramës.
Mbledhja e dy kuvendeve, sipas institucioneve në të dy anët e kufirit, vjen si nevojë e koordinimit të agjendës për realizimin e synimeve që përfshijnë anëtarësimin e Shqipërisë në Bashkim Evropian dhe integrimet euro-atlantike të Kosovës. Gjithashtu, mbrojtjen dhe avancimin e të drejtave të shqiptarëve.