GoFundMe për policin që vrau 17-vjeçarin arrin shifrën 1 milion euro, ngjall zemërim tek masa

Një GoFundMe i hapur për policin francez që shkaktoi trazira mbarëkombëtare duke vrarë një adoleshent gjatë një ndalese trafiku, ka arritur në vlerë prej rreth 1 milion euro, duke shkaktuar zemërim midis politikanëve dhe protestuesve.

I krijuar nga Jean Messiha, një ish-këshilltar i politikanes franceze të ekstremit të djathtë Marine Le Pen, apeli në GoFundMe ka mbledhur rreth 1 milion euro deri më tani, me shifrën që vazhdon të rritet.

Më 27 qershor, oficeri i akuzuar u filmua duke qëlluar në një makinë që drejtohej nga Nahel M, një 17-vjeçar me origjinë afrikano-veriore.

Të shtënat vranë adoleshentin dhe çuan në trazira të tëra në Francë, raporton AlJazeera, përcjell rtv21.tv.

Gjyshja e Nahelit, Nadia, u pyet së fundmi për fushatën e financimit të policit dhe ajo u përgjigj: “Më dhemb zemra”.

Vdekja e djalit ka sjellur në pah debatet mbi historinë e gjatë dhe të trazuar të Francës me popullsinë e saj të pakicave etnike dhe akuzat për brutalitet policor.

Politikanët e qendrës dhe të krahut të majtë dënuan hapjen e GoFundMe për policin.

Eric Bothorel, nga partia En Marche e Presidentit Emmanuel Macron, shkroi në Tëitter: “Jean Messiha fryn në prush. Është gjenerator trazirash. Kazani prej disa qindra mijëra eurosh për policin e akuzuar për vrasjen e të riut Nahel është e pahijshme dhe skandaloze”.

Olivier Faure, kreu i Partisë Socialiste, i bëri thirrje GoFundMe që të mbyllte mbledhjen e fondeve.

“Ju mbani një frakturë tashmë të hapur duke marrë pjesë në mbështetje të një oficeri policie të paditur për vrasje me dashje. Mbylleni!”, shkroi ai.

Në vitin 2019, fondi për një ish-boksier, i cili kishte goditur me grusht disa oficerë policie gjatë demonstratave antiqeveritare të “jelekëve të verdhë” në 2019, u mbyll shpejt.

Politikani i majtë David Guiraud shkroi në Tëitter: “Mesazhi i supozuar është të vrisni arabët, dhe ju do të bëheni milionerë, dhe qeveria e shikon lejon këtë tmerr të kalojë pa thënë asgjë kur kishte mbyllur GoFundMe për boksierin në 2 ditë që goditi një polic. E neveritshme.”

Mes trazirave, të cilat shpesh shfaqin vandalizëm, me protestuesit që përleshen me policinë, Franca ka vendosur 45,000 oficerë në rrugë çdo natë për të shuar trazirat në qytete duke përfshirë Parisin, Strasburgun, Marcein dhe Nicen. /21Media