Haga deklarohet rreth kërkesës së Jakup Krasniqit për pjesëmarrjen në varrimin e të vëllait

Azem Krasniqi, vëllai i ish-kryetarit të Kuvendit të Kosovës, Jakup Krasniqit, vdiq më 5 tetor.

Ai u varros të dielën në fshatin e tij të lindjes, në Negroc të Drenasit.

Por, vëllait të të ndjerit, Jakupit i cili tash e katër vjet po gjykohet në Hagë, nuk mori pjesë në ceremoninë e varrimit.

Portali rtv21.tv ka dërguar pyetje në adresën elektronike të Dhomave të Specializuara, por nuk mori përgjigje konkrete nga DhSK-ja.

Dhomat e Specializuara për rtv21.tv kanë thënë se korniza ligjore e Dhomave të Specializuara të Kosovës u lejon personave të paraburgosur që t’i bëjnë kërkesa Panelit kompetent kur ka arsye bindëse humanitare.

“Paneli do të vendosë për këto kërkesa. Të gjitha dokumentet publike, duke përfshirë parashtresat nga Mbrojtja dhe vendimet e gjyqtarëve publikohen në faqen e internetit të KSK-së, kështu që nëse dhe kur ndonjë informacion i mëtejshëm për këtë çështje është i disponueshëm dhe publik, ai do të publikohet në faqen e internetit të KSK-së”, thuhet në përgjigjen e dërguar me shkrim./21Media