Hapja e urës mbi Ibër, sot pritet publikimi i raportit për stabilitetin e saj

Zëvendës ministri i Infrastrukturës, Hysen Durmishi, tha për rtv21 se raporti për matjet dhe testimin e urës mbi Ibër do të publikohet të martën, pasi kompania që ka kryer punimet do t’ia dorëzojë atë ministrisë. Por, Durmishi nuk ka bërë të ditur se kur do të hapet ura. Partia në pushtet Vetëvendosje ka kundërshtuar çdo kërkesë që për hapjen e urës së Ibrit të diskutohet me Serbinë. Ndërkohë, opozita kërkon nga Qeveria t’i garantojë bashkësisë ndërkombëtare se hapja e saj nuk do të shkaktojë incidente në veri.

Matjet dhe testimet për qëndrueshmërinë e urës mbi lumin Ibër kanë përfunduar dhe një raport mbi qëndrueshmërinë e saj për qarkullimin e automjeteve pritet të dalë të marten. Zëvendës ministri i infratukturës Hysen Durmishi nuk i dha hollësitë për rtv21 mbi rezultatet e raportit dhe njëkohësisht nuk tregoi nëse ura pritet të hapet gjatë kësaj jave edhe nëse në raport konstatohet se ura është e gatshme për qarkullimin e automjeteve.

Në ditën e publikimit të raportit bëhen një javë prej kur nisën testimet në Urën e Ibrit të cilën Qeveria synon ta hapë së shpejti pavarësisht kundërshtimit të bashkësisë ndërkombëtare, që ka kërkuar që për këtë çështje të diskutohet në Bruksel me Serbinë. Por, Qeveria e Kosovës po e kundërshton që për hapjen e urës së Ibrit të diskutohet me Serbinë.

Deputeti i partisë në pushtet Vetëvendosje, Alban Bajrami, tha se nuk lejojnë që presidenti serb Vuçiq ta përdorë urën si figurë shahu për poena politikë.

“BE-ja e ka trajtuar me pompozitet arritjen e marrëveshjes për rivitalizimin e urës. Ka 8 vite që kur është arrit marrëveshja për rivitalizimin e urës i cili nuk ka ndodhur kurrë. Siç duket për BE-në është normale të pritet edhe tetë vite të tjera për rivitalizimin e urës e cila është krejt e zakonshme dhe normale. Kjo urë nuk mund të trajtohet si figurë shahu nga Vuçiq. Kjo urë mund të trajtohet vetëm në aspektin teknik i plotëson apo nuk i plotëson kushtet”, tha Bajrami për rtv21.

Deputeti i PDK-së, Hisen Berisha, tha se ura duhet të hapet por jo pa i bashkërenduar veprimet me SHBA-në dhe BE-në dhe KFOR-in.

“Mbështesim hapjen e urës së Ibrit. Por, Qeveria duhet ti bindë faktorin ndërkombëtar se hapja e urës nuk do të shkaktojë asnjë ekces i cili qon në deesakalimin e situatës. Cdo vendim duhet të jetë në harmoni me aleatët e Kosovës. Veprimet e njëanshme dhe të pakoordinuara gjithmonë kanë sjellë pasoja”, tha Berisha.

Deputeti Berisha shprehë shqetësim sa i përket deklaratave të presidentit serb Vuçiq për çështjen e hapjes së urë së Ibri i cili një ditë më parë tha se Qeveria e Kosovës do ta hapë rrugën më datën 14 të këtij muaji.

“Është shqetësuese deklarata e Vuçiqiq se pret kjo urë të hapet dhe i paragjykon hapur takimet e kryeministrit me ambasadorët e QUINT-it”, tha ai.

Analisti politik Blerim Canaj, vlerëson se çdo veprim i Qeverisë që lidhet me veriun e vendit e që nuk ka koordinim me bashkësinë ndërkombëtare përfundon në proces të dialogut me Serbinë.

“Është bërë njëfar tradite që çdo hap që është ndërmarr pa koordinim të futet në dialog. Siç duket e ka vërejtur këtë edhe kryeministri dhe të gjitha çështjet po i fut në dialog. Kështu e kemi pasur edhe çështjen e dianarit që pas veprimeve të njëanshme u bë temë e diskutimeve në dialog”, tha Cenaj përrtv21.

Ndërkohë, gjatë ditës së hënë janë parë punëtorë të cilët kanë gëlqerosur pjesë të urës së Ibrit. Punimet janë kryer edhe në javën e klaluar dhe mjetet të rënda transporti gjithashtu kanë bërë testikin e qëndrueshmërisë së urës./RTV21/21Media