Harvard padit administratën Trump për bllokimin e regjistrimit të studentëve të huaj

Universiteti i Harvardit po padit administratën Trump pasi ia hoqi universitetit të drejtën për të regjistruar studentë ndërkombëtarë, duke përshkallëzuar një mosmarrëveshje midis Shtëpisë së Bardhë dhe një prej institucioneve më prestigjioze të Amerikës.

Në padinë e ngritur në Boston, universiteti i quajti veprimet e administratës një “shkelje flagrante” të ligjit.

Kjo vjen një ditë pasi zyrtarët në Departamentin e Sigurisë Kombëtare (DHS) thanë se do të anulonin aksesin e Harvardit në programet e vizave studentore.

Administrata Trump thotë se Harvard nuk ka bërë mjaftueshëm për të luftuar antisemitizmin dhe për të ndryshuar praktikat e punësimit dhe pranimeve – akuza që universiteti i ka mohuar fuqimisht.

Në Harvard ka rreth 6,800 studentë ndërkombëtarë, të cilët përbëjnë më shumë se 27% të regjistrimeve të këtij viti.

“Me një të rënë të stilolapsit, qeveria është përpjekur të fshijë një të katërtën e trupit studentor të Harvardit, studentë ndërkombëtarë që kontribuojnë ndjeshëm në Universitet dhe misionin e tij”, argumentoi Harvard në padi.

Universiteti po kërkon një urdhër gjykate për të ndaluar një veprim që DHS bëri të enjten për të revokuar aksesin e Harvardit në Programin e Studentëve dhe Vizitorëve të Shkëmbimit – një bazë të dhënash qeveritare që menaxhon studentët e huaj.

“Ne e dënojmë këtë veprim të paligjshëm dhe të pajustifikuar”, tha Presidenti i Harvardit, Alan Garber, në një letër.

“Revokimi është vazhdim i një sërë veprimesh qeveritare për t’u hakmarrë kundër Harvardit për refuzimin tonë për të hequr dorë nga pavarësia jonë akademike dhe për t’iu nënshtruar pohimit të paligjshëm të kontrollit të qeverisë federale mbi kurrikulën tonë, fakultetin tonë dhe trupin tonë studentor”, shkroi ai.

Në përgjigje, zëvendëssekretarja e shtypit e Shtëpisë së Bardhë, Abigail Jackson, tha: “Sikur Harvardi të interesohej kaq shumë për t’i dhënë fund plagës së agjitatorëve antiamerikanë, antisemitë dhe proterroristë në kampusin e tyre, ata nuk do të ishin në këtë situatë që në fillim”.

“Harvardi duhet të shpenzojë kohën dhe burimet e tij për të krijuar një mjedis të sigurt në kampus, në vend që të ngrejë padi të kota”, tha Jackson në një deklaratë.

‘Ne nuk u regjistruam për këtë’: Studentët e huaj të Harvardit janë të bllokuar dhe të frikësuar
Harvard mbështetet shumë në paratë që vijnë nga studentët ndërkombëtarë, të cilët përbëjnë gati një të tretën e trupit të studentëve të tij. Shumë prej tyre paguajnë tarifën e plotë të shkollimit, ndërsa studentët vendas mund të përfitojnë nga ndihma si bursa dhe kredi.

Për shembull, pagesa e një viti shkollor në Shkollën e Drejtësisë në Harvard kushton 80,760 dollarë (60,758 paund). Duke përfshirë strehimin, ushqimin, sigurimin dhe shpenzime të tjera, studentët mund të presin të paguajnë rreth 120,000 dollarë (90,192 paund) për vitin.

Administrata Trump ka sulmuar Harvardin dhe institucione të tjera elitare, jo vetëm duke argumentuar se ata duhet të bëjnë më shumë për të ndaluar aktivistët pro-palestinezë, por edhe duke pretenduar se ata diskriminojnë pikëpamjet konservatore.

Administrata Trump ka nisur hetime në dhjetëra universitete në të gjithë vendet dhe ka marrë lëshime nga institucione të tjera të mëdha amerikane si Universiteti i Kolumbias në Nju Jork.

Në prill, Shtëpia e Bardhë ngriu 2.2 miliardë dollarë fonde federale për Harvardin  dhe Trump ka kërcënuar të heqë statusin e universitetit të përjashtuar nga taksat, një përcaktim standard për institucionet arsimore amerikane.

Ngrirja e fondeve shkaktoi një padi të mëparshme në Harvard, duke i kërkuar gjithashtu gjykatave të ndalonin veprimet e administratës.

Harvard, një nga tetë universitetet elitare të Ivy League, ndodhet pak jashtë Bostonit në Kembrixh, Massachusetts.

Ndërsa udhëheqësit e Harvardit kanë bërë lëshime – duke përfshirë shkarkimin e udhëheqësve të Qendrës së tij për Studime të Lindjes së Mesme, të cilët ishin kritikuar për dështimin në përfaqësimin e perspektivave izraelite – padia e fundit tregon se universiteti është i gatshëm të luftojë administratën Trump në gjykatë.

Universiteti ka angazhuar disa avokatë republikanë të profilit të lartë në betejën e tij, përfshirë një këshilltar të Organizatës Trump dhe Robert Hur, një ish-këshilltar special i cili hetoi mbajtjen e dokumenteve të klasifikuara nga Joe Biden.

Studentët e huaj që aktualisht ndjekin studimet në Harvard kanë shprehur shqetësime se mosmarrëveshja midis institucionit të tyre mund t’i detyrojë të kthehen në shtëpi.

Studentja kineze Kat Xie, e cila është në vitin e saj të dytë në një program STEM, i tha BBC-së se është “e shokuar”.

“E kisha harruar pothuajse [kërcënimin e mëparshëm për ndalim] dhe pastaj njoftimi i së enjtes erdhi papritur,” tha ajo./21Media